Хоразмлик гандболчи қизлар тантанали кутиб олинди
Жорий йилнинг 10-18 май кунлари Қозоғистоннинг Олмаота шаҳрида гандбол бўйича U-16 қизлар жамоалари ўртасида Осиё чемпионати бўлиб ўтди. Қитъа миқёсида илк бор ташкил этилган нуфузли мусобақада Ўзбекистон U-16 қизлар терма жамоаси кумуш медални қўлга киритиб, шу йил 15-24 октябрь кунлари Марокашнинг Агадир шаҳрида ўтказиладиган жаҳон чемпионатига йўлланмани қўлга киритди.
Мазкур ютуққа муносиб ҳисса қўшган хоразмлик спортчилар Шайдо Матёқубова, Шабнам Матёқубова ҳамда Мафтуна Ботирова Урганч темир йўл вокзалида тантанали равишда кутиб олинди.
Кутиб олиш маросимида вилоят спорт бошқармаси, Спортнинг ўйин турлари ва енгил атлетика бўйича ихтисослаштирилган спорт мактаби, Боғот тумани спорт мактаби, гандбол федерацияси вакиллари, спортчиларнинг мураббийлари, мактаб жамоаси ҳамда ота-оналар иштирок этди.
– Олмаотадаги Осиё чемпионати биз учун ҳақиқий матонат мактаби бўлди, – дейди Шайдо Матёқубова. – Бу мусобақада ҳар бир жамоа бор кучи билан ғолиблик учун курашди. Ҳар бир ўйинда бор кучимизни бериб ҳаракат қилдик. Кумуш медални қўлга киритиб, Жаҳон чемпионати йўлланмасига эга бўлганимизни ҳис қилган дақиқаларимиздаги қувончни сўз билан таърифлаб беролмайман. Бугун Урганч вокзалида бизни бундай юксак эҳтиром ва карнай-сурнайлар билан тантанали кутиб олишларини кутмаган эдик. Бу эътибор бизга янада катта куч беради. Энди тўхташ йўқ, олдинда бизни октябрь ойида Марокаш кутмоқда. Агадир шаҳрида Ўзбекистон қизлари нималарга қодирлигини исботлашга ва юртимиз байроғини баланд кўтаришга ваъда берамиз.
Спортчи қизлар шарафига қўшиқлар куйланиб, рақслар ижро этилди.
Аҳмаджон Шокиров,
Беҳзод Саидов(сурат),ЎзА мухбири
