Гиёҳвандлик савдосига қарши тезкор тадбирлар
Жиззах вилоятида гиёҳвандлик воситаларининг ноқонуний айланмасига қарши ўтказилган тезкор тадбирларда уч нафар фуқарога тааллуқли ҳолатлар аниқланди.
Жумладан, Ғаллаорол туманидаги Дўстлик маҳалласида ўтказилган тадбирда икки дона гугурт қутисига жойланган, жами 13,51 грамм марихуана тегишли тартибда расмийлаштирилди. Дастлабки маълумотларга кўра, 1995 йилда Ғаллаорол туманида туғилган фуқаро ушбу моддани бир миллион сўм эвазига сотган.
Тезкор ҳаракатлар давомида мазкур фуқаро Булунғур туманида яна 8 та гугурт қутисига қадоқланган, жами 45,33 грамм марихуанани уч миллион сўмга сотаётган вақтида ушланган. У вақтинча истиқомат қилаётган хонадон кўздан кечирилганда, қўшимча 188 грамм марихуана ҳамда гиёҳвандлик воситаларини истеъмол қилишга мўлжалланган махсус ашёлар аниқланиб, белгиланган тартибда расмийлаштирилган.
Тезкор тадбир давомида 1997 йилда туғилган иккинчи фуқаро ҳам гумонланувчи тариқасида ушланди. Дастлабки маълумотларга кўра, у истиқомат қилган хонадонда гиёҳвандлик воситалари истеъмол қилинган.
Шунингдек, Жиззах шаҳрининг Заргарлик маҳалласида шубҳали хатти-ҳаракатлари сабаб тўхтатилган учинчи фуқаро – 1998 йилда туғилган шахс ёнидан гугурт қутисида сақланган, гиёҳвандлик воситасига ўхшаш қуритилган ўсимлик кукуни топилган. Модданинг тури ва таркибини аниқлаш учун экспертиза тайинланган.
Ҳолатлар юзасидан тегишли ҳужжатлар расмийлаштирилиб, қонуний баҳо бериш учун белгиланган тартибда чоралар кўрилмоқда.
Абдужалол Қаюмов,
ЎзА мухбири
