Гиёҳвандлик: миллат генофондига таҳдид ва уни бартараф этиш ечимлари (+видео)
Гиёҳвандлик инсон ҳаёти, оилалар ва болалар саломатлигини издан чиқарувчи, миллат генофонди ҳамда келажагига жиддий хавф солувчи иллат ҳисобланади. Шу боис мамлакатимизда ушбу таҳдидга қарши курашиш бўйича қатъий чоралар кўрилмоқда.
Хусусан, Президент томонидан гиёҳвандлик воситалари савдосига қарши курашни кучайтириш ҳамда жамиятни мазкур хавфдан ҳимоя қилишга қаратилган қонуннинг имзоланиши ушбу муаммога қарши курашнинг ҳуқуқий асосларини янада мустаҳкамлади. Янги қонунда наркотикларни тарқатишнинг замонавий усулларига қарши самарали чоралар белгиланиб, бундай жиноятлар учун жавобгарлик кучайтирилди. Шунингдек, вояга етмаганларни ҳимоя қилиш масаласига алоҳида эътибор қаратилди.
Тошкент вилояти Зангиота туманида ҳам "Гиёҳвандлик — миллат генофондига таҳдид ва унинг янги ечимлари" мавзусида профилактик тадбир ташкил этилди. Учрашувда Ўзбекистон Республикаси Олий суди судьяси Аброр Акрамов ҳамда Зангиота тумани пробация инспекторлари иштирок этди.
Тадбирда гиёҳвандлик воситалари ва кучли таъсир қилувчи моддаларнинг ноқонуний айланмасига қарши курашишнинг ҳуқуқий асослари ҳамда суд амалиёти ҳақида атрофлича сўз юритилди.
Судья жамиятда ушбу иллат илдиз отмаслиги ва миллат генофондини асраб қолиш учун фақат жазо чоралари билан чекланиб қолмасдан, жиноят содир этилишига олиб келувчи омилларни бартараф этиш муҳимлигини таъкидлади.
Шунингдек, наркотикларнинг интернет орқали тарқалишига қарши кибермаконда курашиш, ёшлар ўртасида тарғибот ишларини кучайтириш ҳамда маҳаллаларда соғлом муҳитни шакллантиришда ота-оналар масъулиятини ошириш зарурлиги қайд этилди.
Тадбир якунида миллат келажаги ва соғлом авлодни асраш ҳуқуқ-тартибот органлари ёки суднинггина эмас, балки ҳар бир фуқаро ва кенг жамоатчиликнинг ҳам умумий вазифаси эканлиги таъкидланди.
<iframe width="650" height="420" src="https://www.youtube.com/embed/rUFfSlhknbA" title="Giyohvandlik: millat genofondiga tahdid va uni bartaraf etish yechimlari" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>
