Германия тарихида илк бор аёл киши Президент бўлиши мумкин (+видео)
Германия Канцлери Фридрих Мерц мамлакатнинг навбатдаги Федерал Президенти аёл киши бўлиши керак, деган таклифни маъқуллади. У ўзи раҳбарлик қилаётган партиядан аёл вакилни президентликка ягона номзод сифатида илгари сурмоқчи. Бу ҳақда DW хабар берди.
Ушбу ахборотни “Франс Пресс” агентлиги ҳам Берлинда Христиан-демократик иттифоқ партияси ҳудудий бўлимлари раҳбарлари иштирокида кечган ёпиқ йиғилиш қатнашчиларига таяниб тасдиқлади.
– Бу лавозимни албатта аёл киши эгаллаши керак, деган қатъий қарорга келдик, – дея Мерц йиғилишда айтган гапни келтирган нашр.
Маълумотга кўра, ҳозирча номи ошкор қилинмаган номзод 9 ноябргача партия йиғилишида эълон қилиниши кутиляпти.
Мамлакатдаги йирик сиёсий гуруҳ – ГФР Социал-демократлар партияси ҳам Мерцнинг қарорини қўллаб-қувватламоқда.
Аввалроқ собиқ Канцлер Ангела Меркель ҳам Франк-Вальтер Штайнмайердан кейин Федерал Президент лавозимига аёл киши сайланиши лозимлигини айтган эди.
– Германия Федератив Республикаси 77 йиллик тарихида Федерал Президент лавозимини бирор марта ҳам аёл киши эгалламаган, – деган эди у.
Унинг фикрича, ҳар бир киши ўзидан: “Бу анъанани ўзгартириш вақти келмадимикан?” дея сўраши керак.
Президент лавозимига эҳтимолий номзод сифатида Бавария федерал ери ҳукумати раҳбари Илзе Айгнер тахмин қилиняпти. Шунингдек, даъвогарлар орасида Бундестаг раиси Юлия Клёкнер, таълим вазири Карин Прин ҳамда “Насроний-демократлар иттифоқи” партияси собиқ раҳбари Аннегрет Крамп-Карренбауэр ҳам бор.
Штайнмайер лавозимида икки муддат ишлагани сабабли, энди жойини бўшатиши шарт.
Президентни сайлаш ваколатига эга Федерал ассамблея 2027 йил 30 январь куни Германиянинг янги Федерал Президентини сайлайди.
Кенжа Бекжонов, Салимжон Обиджонов (видео), ЎзА
