Футзал: мамлакат чемпионатининг ғолиб ва совриндорлари тақдирланди
Футзал мухлисларига бир олам завқ бағишлаган XXIX миллий чемпионатнинг 2025/2026 йилги мавсуми сўнгги 12-тур ўйинларидан сўнг Олий лига баҳслари якунига кўра чемпионликка эришган ва совриндорлик мақомига кўтарилган жамоалар, мавсумнинг энг яхши футзалчилари, ўзига хос натижа қайд этган мураббий ва мутахассислар Ўзбекистон футзал федерацияси томонидан тақдирланди.
Маросимда иштирок этган Ўзбекистон Миллий олимпия қўмитаси раисининг биринчи ўринбосари Отабек Умаров, Ўзбекистон футзал федерацияси раиси Бекзод Маматқулов, Ўзбекистон футбол ассоциацияси бош котиби Аваз Махсумов, Миллий олимпия қўмитаси бош котиби Ойбек Қосимов ва бошқалар чемпионат ҳар жиҳатдан қизиқарли кечганини, мавсум минг-минглаб ёшларни оммавий спорт ҳаракати билан қамраб олинишида муҳим аҳамият касб этганини эътироф этишди.
Таъкидланганидек, бу йилги 12 та турдан иборат Олий лига баҳсларининг ҳар бир тури жойларда ташкил этилгани, ўйинлар мундарижаси профессионал тарзда белгилангани футзал мавсуми нафақат жамоалар, балки ҳудудларда ушбу спорт турининг оммалашишига, жойларда футзал инфратузилмаси яхшиланишига салмоқли таъсир кўрсатди.
Олий лига ўйинлари якунига кўра, кетма-кет тўртта мавсумдан буён етакчиликни қўлдан бой бермай келаётган Жиззахнинг “BMB PFC” жамоаси 90 очко билан бу йил ҳам чемпионлик мақомига муддатидан олдин кўтарилди.
Жиззахликларга чемпионатнинг олтин медаллари, биринчи даражали диплом ва 500 000 000 сўмлик мукофот сертификати топширилди.
Олий лига дебютанти бўлишига қарамасдан мавсумни кўтаринки кайфиятда ўтказиб, 33 учрашувда 74 очко жамғарган ва иккинчи ўринни эгаллаган SQB чемпионатнинг кумуш медаллари, иккинчи даражали диплом ва 350 000 000 сўм мукофотга лойиқ кўрилди. Чемпионатда 33 учрашувда 68 очко жамғариб, 3-ўринни эгаллаган Бухоронинг “Oil Star” жамоаси 3-даражали диплом ва 200 000 000 сўм миқдоридаги мукофот эгасига айланди.
Шунингдек, кўп йиллар Ўзбекистон миллий терма жамоасини бошқарган, турли жамоаларда ўйинчи, мураббий сифатида фаолият кўрсатган айни пайтда "Максам-Чирчиқ" жамоасида иқтидорли ёшларни тарбиялаб келаётган Баҳодир Аҳмедов “Энг яхши мураббий”, Жиззах жамоаси футболчиси Алех Диас да Силва “Энг яхши ўйинчи”, Акмал Ҳазратқулов (“Максам-Чирчиқ”) “Энг яхши дарвозабон”, Элбек Тўлқинов ва Ҳебберт Оливеира Болт “Энг яхши тўпурар” совринларига эга чиқди.
Бир нечта йўналишлар бўйича ҳам совриндорлар аниқланди.
Т.Рўзиев,
А.Мамадаминов (сурат), ЎзА
