Франция жазирамага қарши фавқулодда режани ишга туширди

Франция ҳукумати кучли жазирама туфайли мамлакат тарихида илк бор “Orsec” фавқулодда ҳаракат режасининг “ўта юқори ҳарорат” тартибини ишга туширди. Orsec — табиий офатлар ва йирик фавқулодда вазиятларда қўлланадиган миллий тезкор ҳаракат тизими бўлиб, бу сафар у рекорд даражадаги иссиқлик сабаб фаоллаштирилди.

Таъкидланишича, “қизил”даражадаги хавф эълон қилинган тўққизта ҳудудда мазкур режа амалга киритилган. Шунингдек, мамлакатнинг яна 72 ҳудудида “тўқ сариқ” огоҳлантириш жорий этилган. Франция миллий метеорология хизмати маълумотига кўра, шанба кунидан бошлаб “қизил” хавф даражаси яна 24 минтақага кенгайтирилади.

Жазирама ортидан ўлкада ёнғинлар ҳам кескин кўпайди. Йил бошидан буён 8 мингдан ортиқ ёнғин қайд этилган бўлиб, улар 25 минг гектардан зиёд майдонни кулга айлантирди. Бу кўрсаткич ўтган йилнинг шу даврига нисбатан икки баравар юқори ҳисобланади.

Расмийлар аҳолини ҳимоя қилиш мақсадида қариялар ва уйсизлар учун махсус совутиш марказларини очишга киришди. Шунингдек, мамлакат шифохоналарига ўрнатилиши режалаштирилган 30 мингта кондиционернинг дастлабки 6 мингтаси ишга туширилган. 

Экологлар эса иқлим ўзгариши туфайли экстремал иссиқлик тўлқинлари тез-тез кузатилаётганини таъкидлаб, мавжуд чоралар етарли эмаслигидан огоҳлантирмоқда.

Мусулмон Зиё, ЎзА