Forishda “Salomatlik uchun 5000 qadam” marafoni
Jizzax viloyatining Forish tumanida sog‘lom hayot tarzini targ‘ib etish, yoshlarni jismoniy faollikka keng jalb qilish va giyohvandlik kabi illatlarga qarshi jamoatchilik birdamligini kuchaytirishga qaratilgan ommaviy yurish marafoni o‘tkazildi.
Oybek va Uchquloch mahallalarida “Biz giyohvandlikka qarshimiz!” shiori ostida tashkil etilgan “Salomatlik uchun 5000 qadam” marafonida mahalla faollari, yoshlar va keng jamoatchilik vakillari ishtirok etdi.
Ertalabki musaffo havoda boshlangan yurish ishtirokchilarni yagona maqsad atrofida birlashtirdi. Qadamlar bir-birini almashar ekan, ularning zamirida oddiy, ammo hayotiy mazmun – sog‘lom tana, tiniq fikr va sog‘lom kelajak sari intilish mujassam edi.
Ayniqsa, yoshlarning faol ishtiroki tadbirga alohida ruh bag‘ishladi. Zero, sog‘lom avlodni tarbiyalash faqat tibbiy yoki sportga oid vazifa emas, balki butun jamiyatning umumiy maqsadi va mas’uliyatidir. Shu ma’noda, har bir ommaviy yurish, har bir sport tadbiri yoshlarni zararli odatlardan yiroqlashtirib, ularni foydali va mazmunli mashg‘ulotlarga chorlashda muhim ahamiyat kasb etadi.
Bugun giyohvandlikka qarshi kurash faqat huquqni muhofaza qiluvchi idoralar yoki tibbiyot xodimlarining vazifasi bo‘lib qolmayapti. Bu borada oila, mahalla, ta’lim muassasalari, jamoat tashkilotlari va keng aholining hamjihatligi tobora muhim ahamiyat kasb etmoqda. Chunki zararli illatning oldini olish uning oqibatlariga qarshi kurashishdan ko‘ra foydaliroqdir.
“Salomatlik uchun 5000 qadam” marafoni ana shu ezgu maqsadni oddiy va ta’sirchan tarzda ifoda etdi. Bu yerda har bir qadam – harakat, har bir harakat – sog‘lom turmushga intilish, har bir ishtirokchi esa sog‘lom jamiyat barpo etishga qo‘shilgan hissa bo‘ldi.
Forishdagi tadbir ishtirokchilari o‘z harakati bilan bir haqiqatni yana bir bor namoyon etdi: sog‘lom hayot sari yo‘l uzoqdan boshlanmaydi. U insonning o‘zidan, o‘z tanlovidan va bugun tashlagan birinchi qadamidan boshlanadi.
Abdujalol Qayumov,
O‘zA muxbiri
