Енгил атлетика: янгиланган саралаш тизими йўлланмалар сонига таъсир кўрсатадими?
Халқаро енгил атлетика федерацияси (World Athletics) 2028 йили АҚШнинг Лос-Анжелес шаҳрида ўтадиган ёзги Олимпия ўйинларининг янгиланган саралаш тизимини эълон қилди.
Унга кўра, 2028 йилнинг 15-30 июль кунлари Олимпия ўйинлари дастурида ўтадиган енгил атлетика мусобақаларида спортчилар белгиланган саралаш меъёрларини бажариши ёки жаҳон рейтинги орқали тўрт йилликнинг йўлланмасини қўлга киритиши мумкин бўлади. Йўлланмаларнинг 40 фоизи саралаш, 60 фоизи эса жаҳон рейтинги асосида тақсимланиши белгиланди.
Олимпиада дастурида эркаклар ва аёллар 23 тадан йўналишдаги баҳсларда иштирок этади. Олимпия ўйинларида илк бор 4×100 метр ва 4×400 метрга аралаш эстафета баҳслари ўтказилади.
Айтиш лозимки, Олимпия ўйинлари йўлланмаларининг 40 фоизи белгиланган меъёрларни бажарганларга, 60 фоизи жаҳон рейтинги асосида берилиши тасдиқланган бўлса-да, меъёрни бажариш йўлланмани тўғридан-тўғри кафолатламайди, дегани эмас аслида. Бунда, спортчи меъёрни бажарган тақдирда, энг яхши натижалар инобатга олиниши кўзда тутилган.
Ҳар бир мамлакатдан битта йўналиш бўйича кўпи билан уч нафар спортчи саралашда ҳисобга олиниши тасдиқланган.
Саралаш муддатлари марафон мусобақаларида жорий йил 1 ноябрдан 2028 йил 30 апрелгача, 10 000 метр, кўпкураш, спортча юриш ва эстафеталар шу йил 19 декабрдан 2028 йил 18 июнгача, қолган йўналишлар келгуси йил 19 июндан 2028 йил 18 июнгача тақсимланиши режалаштирилган.
Айрим йўналишлар бўйича махсус тартиб назарда тутилган бўлиб, марафон мусобақаларида 2028 йил 19 март ҳолатига кўра, саралаш рейтингидаги дастлабки 56 нафар атлет йўлланма олади. Қолган 15 та ўрин саралаш тартиби асосида тақсимланади.
Янги тартиб ҳолатидан кўриниб турибдики, бу галги Олимпия ўйинларида енгил атлетика мусобақалари йўлланмаларbга эга чиқишда шаффофликка эътибор кучайтирилмоқда.
Хўш, шундай вазиятда ўзбекистонлик спортчиларнинг “Лос-Анжелес-2028” Олимпиадасининг енгил атлетика мусобақалари йўлланмаларига эга чиқиш имкониятлари қандай?
Бошланишига икки йилдан ортиқ вақт қолган ёзги Олимпия ўйинларининг йўлланма ва рейтинг очколари учун қизғин курашлар аллақачон бошланиб кетганига, жаҳоннинг етакчи терма жамоалари қатори мамлакатимиз атлетлари ҳам ушбу курашларда муносиб иштирок этаётганини инобатга олсак, йўлланмалар сони бўйича сифат кўрсаткичимиз яхшиланишига ишонгимиз келади.
Дарҳақиқат, жорий йил давомида юртимиз енгил атлетикачиларининг жаҳон биринчиликлари, World Athletics тизимидаги халқаро турнир ва чемпионатларда, қитъа чемпионатларида муносиб натижалар қайд этаётгани ўзбек енгил атлетикасининг янги авлоди камол топаётганини кўрсатмоқда.
Бундан ташқари, мамлакатимизда оммавий енгил атлетика мусобақалари, ўсмир ёшлар ўртасида “Президент олимпиадаси” ўйинларининг йўлга қўйилгани истеъдодларни кашф этишга, янги рекордлар ўрнатилишига олиб келмоқдаки, бу, ўз навбатида, маҳоратли спортчиларни камолга етишига хизмат қилмоқда.
Яна ҳам муҳим жиҳати, бугунги кунда халқаро мусобақаларда катта ютуқларга эришиб келаётган Анвар Анваров, Сафина Саъдуллаева, Шарифа Давронова, Шоҳрух Давлатов, Жонбиби Ҳукмова, Барнохон Сайфуллаева, Паризода Талабова, Шаҳзодбек Холмуродов, Малика Насриддинова, Валерия Горбатова каби спортчиларимизнинг қитъа ва жаҳон рейтингидаги баллари ортиб бораётгани “Лос-Анжелес-2028” Олимпиадасидаги натижаларимиз “Париж-2024” ва “Токио-2020” ўйинларидагидан янада яхшиланишига умид уйғотаётгани билан эътиборли.
Тўлқин Рўзиев,
ЎзА
