Екатерина Макарочкина тарихий олтин медални қўлга киритди
Филиппинда ўтаётган велоспортнинг трек йўналиши бўйича Осиё чемпионатида терма жамоамиз аъзоси Екатерина Макарочкина тарихий натижа қайд этди.
Гап шундаки, қитъа биринчилигининг ёшлар (қизлар) ўртасида “Omnium” бўйича беллашувлари ўтказилди. Олимпия ўйинлари дастурига кирувчи ҳамда 4 та пойгани ўз ичига олган ушбу йўналишда Ўзбекистон терма жамоаси аъзоси Екатерина Макарочкина муваффақиятли иштирок этиб, олтин медални қўлга киритди.
Шуни таъкидлаб ўтишимиз лозимки, ёшлар (қизлар) ўртасида ҳозирга қадар бирор бир велоспортчимиз Осиё чемпионатларида олтин медаль, айниқса, “Omnium” дастурида бундай натижани қайд этмаган эди.
Дарвоқе, Екатерина Макарочкина учун бу учинчи медаль ҳисобланади. У бундан аввал жамоавий баҳсларда бронза ва қизлар ўртасидаги 20 километр (80 айлана) масофада ўтган “Мэдисон” пойгасида Надежда Бартенеева билан жуфтликда кумуш медалга сазовор бўлган эди.
Жавоҳир Тошхўжаев,
ЎзА
