Денис Истомин “Kutaisi Open” турнирини ғалаба билан бошлади

Грузияда теннис бўйича эркаклар ўртасида M25 тоифасига кирувчи “Kutaisi Open” халқаро турнирида уч нафар вакилимиз – Денис Истомин, Сергей Фомин ва Максим Шин яккалик ҳамда жуфтлик беллашувларида бош соврин учун рақобатлашмоқда.

Аниқроқ айтадиган бўлсак, мусобақанинг жуфтлик баҳсларида тажрибали теннисчимиз Денис Истомин эса Максим Шин билан биргаликда руминиялик Лукаш Густин ва канадалик Николалон тандемини 7:6, 4:6 ва 10:4 ҳисобида таслим этди. Шу тариқа Денис ва Максим мусобақанинг чорак финалида испаниялик Самуэл де Фелипе Гарсия ва Жон Эчеверриага қарши кортга чиқадиган бўлди.

Афсуски, Сергей Фомин италиялик шериги Александр Бинда билан тандемда нейтрал теннисчи Евгений Филиппов ва арманистонлик Даниил Саркисян дуэтига имкониятни бой бериб қўйди.

Дарвоқе, мукофот жамғармаси 30 минг АҚШ долларини ташкил этувчи “Kutaisi Open” турнирининг яккалик баҳсларида мамлакатимизнинг биринчи рақамли теннисчиси Сергей Фомин нейтрал теннисчи Михайл Кулягин, Максим Шин эса португалиялик Франческо Фариа билан рақобатлашади. 

Жавоҳир Тошхўжаев,
ЎзА