“Чинор” метро бекати 50 кунга ёпилади
Тошкент метрополитенининг “Чинор” бекатида кенг кўламли реконструкция ишлари амалга оширилиши муносабати билан бекат вақтинча фаолиятини тўхтатади.
Метрополитен матбуот хизматининг маълум қилишича, мазкур лойиҳа йўловчилар учун янада қулай, хавфсиз ва замонавий инфратузилма яратишга қаратилган. Реконструкция жараёнида бекатнинг кириш-чиқиш ҳудудлари кенгайтирилиб, катта сиғимга эга 4 та замонавий лифт ҳамда қўшимча 12 та турникет ўрнатилади.
Қайд этилишича, қурилиш-монтаж ишларини хавфсиз ва сифатли тарзда бажариш мақсадида 2026 йил 13 июндан бошлаб “Чинор” метро бекати йўловчилар учун 50 кун муддатга ёпилади.
Йўловчиларга қулайлик яратиш мақсадида ушбу даврда “Чинор” ва “Янгиҳаёт” метро бекатлари ўртасида махсус метробуслар қатнови ташкил этилади. Мазкур транспорт воситалари метро йўловчиларининг ҳаракатланишида юзага келиши мумкин бўлган ноқулайликларни камайтиришга хизмат қилади.
Метрополитен раҳбарияти йўловчилардан вақтинчалик ноқулайликлар учун узр сўраб, амалга оширилаётган ишлар келгусида хизмат сифати ва бекат имкониятларини янада яхшилашга хизмат қилишини таъкидлади.
Ш.Маматуропова, ЎзА
