Бухорода пахта теримига расман старт берилди

Бир йиллик меҳнатнинг энг масъулиятли палласи бошланди. Баҳорда ерга қадалган чигит, ёз бўйи қилинган машаққатли меҳнат ва умид билан парваришланган ғўзалар энди ўз ҳосилини намоён этмоқда. Далалардаги оқ олтин — деҳқон ва фермернинг бир йиллик меҳнати самараси, юрт дастурхони ва иқтисодий тараққиётга қўшиладиган муносиб ҳисса тимсоли.

Бухоро вилоятида 2026 йил ҳосили учун пахта йиғим-терими мавсумига расман старт берилди.

Шу муносабат билан вилоят ҳокими Ботир Зарипов бошчилигида тегишли соҳа мутасаддилари, пахтачилик-ғаллачилик кластерлари раҳбарлари, вилоят ҳокимининг ўринбосарлари, агросаноат мажмуасига дахлдор ташкилотлар, таъминот ва хизмат кўрсатувчи корхоналар масъуллари, соҳа фахрийлари ҳамда илғор фермерлар Баҳовуддин Нақшбанд зиёратгоҳида жам бўлишди.

Тадбир аввалида Қуръон тиловат қилиниб, юртимизда тинчлик-хотиржамлик, дастурхонларимиз тўкинлиги, деҳқон ва фермерларнинг машаққатли меҳнати самарали бўлиши, далалардаги ҳосил баракали йиғиб олиниши тилаб дуо қилинди.

Бу эзгу ниятлар билан бошланган мавсум энди катта масъулиятни талаб қилади. Зеро, пахта етиштириш қанчалик машаққатли бўлса, уни ўз вақтида, сифатли ва нобудгарчиликсиз йиғиб олиш ҳам шунчалик муҳим.

Бугун мамлакатимиз қишлоқ хўжалигида амалга оширилаётган кенг кўламли ислоҳотлар натижасида соҳада меҳнат қилиш, ердан унумли фойдаланиш ва юқори ҳосилдорликка эришишнинг янги имкониятлари яратилмоқда.

Давлат раҳбари ташаббуси билан қишлоқ хўжалигида илм-фан ва ишлаб чиқариш интеграциясини кучайтириш, замонавий агротехнологияларни жорий этиш, сув ва ер ресурсларидан оқилона фойдаланиш, янги навларни синовдан ўтказиш, рақамлаштириш ва механизацияни кенгайтиришга алоҳида эътибор қаратилмоқда.

Бу ислоҳотларнинг бош мақсади ҳам аниқ — ер эгасининг меҳнатини муносиб қадрлаш, фермер даромадини ошириш, аграр соҳанинг самарадорлигини юксалтириш ва мамлакатнинг озиқ-овқат ҳамда саноат хомашёси базасини мустаҳкамлаш.

Пахтачиликда ҳам эндиликда гап фақат қанча ҳосил етиштириш ҳақида эмас. Етиштирилган ҳосилни нобуд қилмасдан, белгиланган муддатларда ва сифат талабларига мувофиқ йиғиб олиш муҳим вазифага айланмоқда.

Жорий йилда Бухоро вилоятида 3 122 та фермер хўжалигининг 85 минг гектар майдонида 450 минг тонна пахта хомашёси етиштириш белгиланган. Бу — катта меҳнат, катта масъулият ва катта мақсад. Вилоят бўйича ўртача ҳосилдорликни 52,9 центнерга етказиш режалаштирилган. Етиштирилган ҳосилни қабул қилиш учун 9 та кластер ва кооперациянинг 32 та пахта қабул қилиш маскани мавсумга тайёр ҳолатга келтирилди. Демак, энди асосий эътибор далалардаги ҳосилни қисқа муддатларда ва сифатини сақлаган ҳолда йиғиб олишга қаратилади. Пахта терими — катта меҳнат сафарбарлигини талаб қиладиган мавсум. Жорий йилда йиғим-терим ишларини самарали ташкил этиш мақсадида 2 040 та отряд шакллантирилиб, уларга 102 минг нафар теримчи жалб этилади.

Уларнинг 62,1 минг нафари фермер хўжаликлари аъзолари, 29,5 минг нафари уюшмаган аҳоли ҳамда 10,3 минг нафари шаҳар ва туман марказларидан ихтиёрий равишда теримда иштирок этадиган фуқаролардан иборат. Бироқ бу йилги мавсумнинг муҳим жиҳатларидан бири — қўл меҳнати билан бир қаторда замонавий техникалардан кенг фойдаланилаётганидир. Жорий йилда вилоятда 90 та янги пахта териш машинаси харид қилинди.

Умуман, мавсумга 128 та пахта териш машинаси жалб этилган. Улар орасида 65 та FM World, 36 та John Deere, 9 та Swan, 9 та Boshiran, шунингдек, 9 та Case ва Kanza русумли терим машиналари бор. Бу рақамлар аграр соҳада механизация жараёни тобора кучайиб бораётганини кўрсатади. Замонавий техника эса нафақат меҳнат унумдорлигини оширади, балки ҳосилни қисқа муддатда йиғиб олиш, унинг сифатини сақлаш ва мавсумни уюшқоқлик билан ўтказиш имконини беради.

Пахта йиғим-терими муваффақияти фақат теримчининг меҳнатига эмас, бутун бир тизимнинг ҳамжиҳатлигига боғлиқ. Шу боис мавсумнинг узлуксиз ташкил этилиши учун 3 122 та транспорт трактори, 3 508 та тиркама ва теримчиларни ташишга мўлжалланган 610 та транспорт воситаси сафарбар этилган. Теримчилар учун зарур шароитларни яратишга ҳам жиддий эътибор қаратилган. Хусусан, 204 минг дона этак, 3 122 дона тарози, 3 122 дона қозон-ўчоқ, 3 122 дона самовар, 4 683 дона сув сақлаш баки ва 7 016 дона тиркама учун ёпинчиқ захираси яратилган. Бу рақамлар ортида оддий бир мақсад мужассам: теримчи далага чиққан экан, унинг меҳнати учун муносиб шароит яратилиши шарт.

Мавсумни самарали ташкил этишда хавфсизлик масаласи ҳам устувор вазифалардан бири. Пахта териш машиналаридан самарали фойдаланиш ва иш жараёнини мувофиқлаштириш мақсадида 152 та махсус отряд ташкил этилди. Уларга жамоат хавфсизлиги ва фавқулодда ҳолатларнинг олдини олиш ишларини мувофиқлаштириш учун ички ишлар ҳамда фавқулодда вазиятлар бўлимларидан масъул ходимлар бириктирилди.

Шунингдек, вилоятнинг барча туманларида пахта ҳосилини сифатли ва қисқа муддатларда йиғиб олиш бўйича туман штаблари ташкил этилди. Бу эса мавсум давомида ҳар бир жараённи назорат қилиш, юзага келиши мумкин бўлган муаммоларни тезкор бартараф этиш ва барча иштирокчиларнинг ҳаракатини бир мақсад сари йўналтириш имконини беради. Ҳар бир чигит ортида бир йиллик меҳнат бор

Пахта — шунчаки қишлоқ хўжалиги экинларидан бири эмас. Унинг ортида фермернинг бир йиллик меҳнати, сувчи ва агрономнинг машаққати, механизаторнинг тер тўкиши, ишчи ва теримчининг кундалик меҳнати мужассам. Шу боис далалардаги ҳосилни йиғиб олишда ҳар бир кун, ҳар бир соат муҳим. Энди асосий вазифа — 85 минг гектар майдонда етиштирилган ҳосилни белгиланган муддатларда, сифатини сақлаган ҳолда ва нобудгарчиликсиз йиғиб олиш. Бунинг учун барча имкониятлар — меҳнат ресурслари, замонавий техника, транспорт, қабул масканлари ва зарур инфратузилма сафарбар этилган. Энг муҳими, мавсумда инсон омили ва меҳнат хавфсизлигига эътибор сусайтирилмаслиги, теримчилар учун муносиб шароитлар таъминланиши, етиштирилган ҳосил эса адолатли ва сифатли қабул қилиниши зарур.

Бухоро далаларида бошланган 2026 йил пахта йиғим-терими — бир йиллик машаққатнинг якуний синови. Давлат раҳбари ташаббуси билан қишлоқ хўжалигида амалга оширилаётган ислоҳотлар, замонавий техника ва технологияларнинг жорий этилиши, фермерларга яратилаётган имкониятлар бугун далаларда ўз ифодасини топмоқда. Энди ана шу имкониятларнинг натижасини кўрсатиш вақти.

450 минг тонна пахта хомашёси — шунчаки режа эмас. Бу 3 122 та фермер хўжалигининг, минглаб деҳқон ва механизаторларнинг, юз минглаб теримчиларнинг умумий меҳнати самарасидир.

Шу боис бу мавсумда ҳар бир йиғилган пахта, ҳар бир тўкилмай сақлаб қолинган кўсак, ҳар бир сифатли қабул қилинган тонна — меҳнатга бўлган ҳурматнинг амалий ифодаси бўлади.

Бухоро далаларида пахта терими бошланди. Энди вазифа битта — далалардаги ҳосилни юксак хирмонларга айлантириш. Бунинг учун техника ҳам бор, имконият ҳам, меҳнат ресурси ҳам. Қолгани — уюшқоқлик, масъулият, ҳамжиҳатлик ва энг муҳими, деҳқон меҳнатига бўлган юксак эҳтиромга боғлиқ. Зеро, оқ олтиннинг баракаси — ердан эмас, ерга меҳр билан меҳнат қилган инсон қўлидан бошланади.

Зариф Комилов, ЎзА мухбири