Бугун Суперлиганинг 15-турига старт берилади
Ўзбекистон Суперлигасида 15-тур баҳслари бугун старт олар экан, ҳар бир учрашув турнир жадвалидаги вазиятни ўзгартириш имконига эга. Энди йўқотилган ҳар бир очко нафақат чемпионлик учун курашда, балки Осиё майдонларига йўлланма ва элитада жон сақлаб қолиш масаласида ҳам қимматга тушиши мумкин.
Айниқса, сўнгги турларда пешқадамлар орасидаги очколар фарқи қисқариб, рақобат янада кескин тус олди. Шу боис, 15-тур нафақат навбатдаги беллашувлар, балки чемпионлик пойгасининг янги босқичи сифатида ҳам баҳоланмоқда.
Турнинг илк кунида эътибор марказидаги баҳслардан бири Андижонда бўлиб ўтади. Унда «Андижон» «Пахтакор» клубини қабул қилади. Пойтахтликлар статистика бўйича рақибидан яққол устун. Жамоалар чемпионатлар доирасида 58 марта тўқнаш келган бўлиб, уларнинг 42 тасида «Пахтакор» ғалаба қозонган. Яна 9 учрашув дуранг билан якунланган, 7 марта эса андижонликлар зафар қучган. Голлар нисбати ҳам «шерлар» фойдасига — 140:44. Бироқ, бугунги баҳсда статистика эмас, айни пайтдаги спорт формаси ҳал қилувчи омилга айланиши мумкин.
Куннинг иккинчи ўйинида «Бухоро» ўз майдонида «Локомотив»ни қабул қилади. Майдон эгалари юқори поғоналар учун курашда муҳим очколарни қўлдан чиқармасликка интилса, меҳмонлар турнир жадвалидаги мавқеини мустаҳкамлашни мақсад қилган.
2 август кунги дастурдан «Навбаҳор» — «Хоразм», «Машъал» — «Сўғдиёна» ҳамда «Қизилқум» — «Бунёдкор» учрашувлари ўрин олган. Бу беллашувлар, айниқса, турнир жадвалининг ўрта ва қуйи қисмидаги рақобат нуқтаи назаридан катта аҳамият касб этади.
Бироқ, 15-турнинг асосий интригаси 3 август кунига сақлаб қўйилган. Олмалиқда ОКМК Қаршининг «Насаф» клубини қабул қилади. Ҳар икки жамоа учун ҳам бу учрашув йўқотиш мумкин бўлмаган очколар баҳсига айланади.
Турнинг марказий беллашуви эса Самарқандда бўлиб ўтади. Турнир пешқадами «Нефтчи» меҳмон сифатида «Динамо»га қарши майдонга тушади. Самарқандликлар сафида тўпурарлар пойгаси етакчиси Анваржон Ҳожимирзаевнинг иштироки мазкур баҳсга алоҳида қизиқиш уйғотмоқда. Агар мезбонлар ғалаба қозонса, чемпионлик пойгасидаги мувозанат янада ўзгариши мумкин. «Нефтчи»нинг муваффақияти эса фақат пешқадамликни эмас, руҳий устунликни ҳам мустаҳкамлайди.
Қисқаси, бугун старт оладиган 15-тур Суперлига мавсумининг энг муҳим бурилиш нуқталаридан бири бўлиши кутилмоқда. Энди ҳар бир тур, ҳар бир гол ва ҳар бир очко чемпионлик тақдирига тобора яқинлашиб бораётган жавобни шакллантиради.
Жавоҳир Тошхўжаев, ЎзА
