Бокс: Осиё чемпионати кутилган ва кутилмаган натижаларга бой ўтмоқда
Мўғулистон пойтахти Улан-Баторда Asian Boxing ташкилоти томонидан катталар ўртасида ўтказилаётган Осиё чемпионатининг ортда қолган учинчи кунги баҳслари кутилган ва кутилмаган натижаларга бой бўлди.
Бугун, 1 апрель куни ўтказилган саралаш жангларида рингга кўтарилган Асилбек Жалилов -50 килограмм оғирликда япониялик Даичи Иваига 1:4 ҳисобида имкониятни бой бериши кутилмаган натижа сифатида ёдда қоладиган бўлди.
Қитъа биринчилигининг -60 кило оғирлигида терма жамоамиз аъзоси Абдураҳмон Маҳмуджонов кутилганидек хитойлик Хинлин Ченни 5:0 ҳисобида мағлуб этди.
Эртага қитъа биринчилигининг тўртинчи кунида 3 нафар боксчимиз чорак финал жангларида қатнашади.
Жумладан, -65 килограммда Абдуллоҳ Мадаминов сингапурлик Каелан Кларк билан, -80 килода Фазлиддин Эркинбоев қирғизистонлик Сағин Сатибалди Уулу билан, +90 кило оғирликда Арман Маханов мўғулистонлик Бекнур Хали билан рўбарў келади.
Айтиш лозим, тўртинчи кунги жанглар олдидан Ўзбекистон эркаклар ва аёллар терма жамоаси аъзоларининг 3 нафари илк жангларда имкониятни бой берган бўлса, 2 нафари саралашни муваффақиятли ўтказди.
21 та давлатнинг маҳоратли чарм қўлқоп усталари иштирок этаётган қитъа чемпионати 10 апрелга қадар давом этади.
Т.Рўзиев, ЎзА
