Biznesni rivojlantirish banki Samarqandda samarali tadbirlarni amalga oshirdi
Osiyo taraqqiyot banki (OTB) boshqaruvchilar Kengashining 59-yillik yig‘ilishi doirasida “Biznesni rivojlantirish banki” ATB tomonidan “Moliyaviy bo‘lmagan xizmatlar KO‘B o‘sishi katalizatori sifatida" mavzusida sessiya tashkil etildi.
Samarqandda bo‘lib o‘tayotgan OTBning yillik yig‘ilishi hukumatlar, xalqaro tashkilotlar, biznes va ekspertlar hamjamiyati vakillarini barqaror rivojlanish va iqtisodiy integratsiyaning asosiy masalalarini muhokama qilish uchun birlashtirdi. Tadbirlarda iqtisodiyotni qo‘llab-quvvatlashning haqiqiy vositalarini namoyish etadigan biznes sessiyalari va amaliy ishlarga alohida e’tibor qaratilmoqda.
Xususan, “Moliyaviy bo‘lmagan xizmatlar KO‘B o‘sishi katalizatori sifatida” sessiyasi bankning moliyaviy bo‘lmagan xizmatlarining kichik va o‘rta biznesni rivojlantirishdagi roliga bag‘ishlandi. Ishtirokchilar tomonidan nima uchun moliyalashtirishning o‘zi yetarli emasligi va o‘qitish, mentoring, maslahat va bozorga kirishga doir barqaror biznes modellarini qanday shakllantirishi kabi muhim mavzular atroflicha muhokama qilindi.
Osiyo taraqqiyot banki (OTB)ning xususiy sektor moliya institutlari bo‘yicha direktori Suxayl Yoqub Xon moderatorligida o‘tgan sessiyada bank Boshqaruvi raisi – Saxi Annaklichev tomonidan nomoliyaviy xizmatlarga e’tibor qaratilgan holda bankni tadbirkorlikni qo‘llab-quvvatlashning yaxlit ekotizimiga aylantirish strategiyasi taqdim etildi.
O‘z navbatida Osiyo taraqqiyot banki (OTB) vakillari, tadbirkorlar tomonidan xalqaro tajriba, jahon va Yevropa bozorlariga chiqish hamda yirik loyihalarga doir taqdimotlar qilindi.
Shuningdek, ma’ruzachilar tomonidan bank transformatsiyasi va KO‘B rasmiylashtirish dasturlari, shuningdek, xizmatlarning ekotizimi va bankning raqamli platformasini rivojlantirishga qaratilgan joriy va istiqboldagi nomoliyaviy xizmatlar haqida ham atroflicha fikr almashildi.
Moliyaviy bo‘lmagan xizmatlar kichik va o‘rta biznesni rivojlantirishning strategik vositasi ekanligini namoyish etish, investitsiyalar samaradorligini sezilarli darajada oshirish, kompaniyalarning o‘sishini tezlashtirish va ularning xalqaro bozorlarga chiqish imkoniyatlarini oshirish maqsadida tashkil etilgan sessiya muhokamalarga boy bo‘ldi.
Saxi Annaklichev, “Biznesni rivojlantirish banki” ATB boshqaruvi raisi:
— Bugungi kunda kichik va o‘rta biznes O‘zbekiston iqtisodiyotining barqarorligi va moslashuvchanligining asosidir va bizning asosiy vazifamiz ham moliyalashtirishdan foydalanish imkoniyatini ta’minlash, eng muhimi, tadbirkorlarni qo‘llab-quvvatlashning to‘liq ekotizimini yaratishdir. Rivojlanish bankining qiymati moliyaviy ko‘rsatkichlar bilan emas, balki qancha odam o‘sishi va o‘zini anglashiga yordam bergani bilan o‘lchanadi. Shuning uchun biz moliyaviy bo‘lmagan xizmatlarni keyingi asosiy bosqich – biznesni mustahkamlash, kengaytirish va yangi bozorlarga chiqishga yordam beradigan vosita deb bilamiz.
Umuman olganda, sessiya ishtirokchilari moliyaviy bo‘lmagan xizmatlar kapitalga kirish bilan bir qatorda muhim rol o‘ynaydigan kompleks yondashuvsiz kichik va o‘rta biznesni barqaror rivojlantirish mumkin emasligiga rozi bo‘lishdi. Bilim, raqamli vositalar va global bozorlarga integratsiya orqali tadbirkorlarning imkoniyatlarini kengaytirish yanada raqobatbardosh va barqaror iqtisodiyotni shakllantiradi. Bunday tashabbuslar alohida kompaniyalarni kuchaytiradi va butun biznes muhiti uchun multiplikativ effekt yaratadi.
Shu bilan birga, anjuman doirasida bir qator uchrashuvlar tashkil etildi. Mazkur muloqotlar davomida bankning xalqaro hamkorligini kengaytirish, moliyaviy resurslarni jalb qilish, shuningdek, zamonaviy moliyalashtirish mexanizmlarini joriy etish masalalari atroflicha muhokama qilindi.
Xususan, Foresight kompaniyasi (Gruziya) bilan investitsion sheriklikni rivojlantirish istiqbollari, Abu Dhabi Commercial Bank (BAA) bilan savdoni moliyalashtirish va g‘aznachilik operatsiyalari yo‘nalishida hamkorlik o‘rnatish, Kuveyt Türk Participation Bank (Turkiya) bilan islom moliyasi tamoyillari asosida hamkorlikni yo‘lga qo‘yish, Raiffeisen Bank International (Avstriya) bilan savdo moliyasi, g‘aznachilik xizmatlari hamda institutsional hamkorlikni kengaytirish masalalari muhokama qilindi.
Osiyo taraqqiyot banki Moliya, inson va ijtimoiy rivojlanish hamda davlat boshqaruvi sektorlari bosh direktori Kristin Engstrom va Xususiy sektor operatsiyalari departamenti Xususiy sektor moliya institutlari bo‘yicha direktori Suxayl Yoqub Xon bilan o‘tkazilgan uchrashuvlarda strategik hamkorlikni yanada chuqurlashtirish, jumladan Savdoni yengillashtirish dasturi (Trade Facilitation Program) doirasida hamkorlikni yo‘lga qo‘yish, uzoq muddatli moliyalashtirish liniyalarini jalb qilish, qisman kredit kafolatlari mexanizmlaridan foydalanish hamda aralash moliyalashtirish instrumentlarini joriy etish masalalari muhokama qilindi.
Shuningdek, Standard Chartered Bank (Buyuk Britaniya) bilan xalqaro moliya institutlari kafolatlari ostida moliyalashtirishni tashkil etish va yevroobligatsiyalar chiqarish bo‘yicha hamkorlik istiqbollari, Commerzbank AG (Germaniya) bilan savdo moliyasi va akkreditiv operatsiyalarini rivojlantirish, Fransiya taraqqiyot agentligi (Fransiya) bilan barqaror rivojlanish va investitsiya loyihalarini moliyalashtirish, hamda ICBC Standard Bank (Buyuk Britaniya) bilan strukturali moliyalashtirish va yevroobligatsiyalar chiqarish bo‘yicha hamkorlik istiqbollari ko‘rib chiqildi.
Uchrashuvlar yakunlarida xorijiy hamkorlar bilan hamkorlikni yanada kengaytirish, resurs bazasini diversifikatsiya qilish, ilg‘or moliyalashtirish instrumentlarini joriy etish hamda uzoq muddatli strategik sheriklik munosabatlarini mustahkamlashga kelishib olindi.
Bank axborot xizmati
