Бир йилда 100 поғона ўсиш
Мирзо Улуғбек олий мадрасасининг вориси ҳисобланган Шароф Рашидов номидаги Самарқанд давлат университети халқаро рейтингларда ўрнини мустаҳкамламоқда.
Хусусан, 2026 йил 3 ноябрь куни Ўзбекистоннинг 38 та олий таълим ташкилотидан ўрин олган нуфузли QS Quacquarelli Symonds халқаро рейтинг агентлиги томонидан Осиёнинг энг яхши университетлари рейтинги – “QS Asia University Rankings 2027” эълон қилинди.
Шароф Рашидов номидаги Самарқанд давлат университети Осиёнинг энг яхши университетлари рўйхатида 215-ўринни эгаллаб, аввалги йилга нисбатан ўз мавқеини қарийб 100 поғонага яхшилади. Университет 2025 йилда 307-ўринда эди.
Бу натижа билан университет Марказий Осиёда 11-ўринни (2025-йилда 20-ўрин), Ўзбекистонда эса 3-ўринни (2025-йилда 5-ўрин) эгаллади.
QS Asia University Rankings – бу Осиё қитъасидаги энг кучли олий таълим муассасаларини аниқлаб берувчи нуфузли минтақавий рейтинг. У Буюк Британиянинг QS (Quacquarelli Symonds) таҳлилий компанияси томонидан 2009 йилдан буён ҳар йили анъанавий тарзда эълон қилиб келинади.
Ушбу рейтинг глобал (QS World University Rankings) рейтингининг кенгайтирилган бир қисми бўлиб, унда баҳолаш мезонлари айнан Осиё минтақасидаги университетларнинг устувор йўналишлари, имкониятлари ва муаммоларига мослаштирилган.
Бу йилги рейтинг натижалари мамлакатимиз олий таълим тизимида олиб борилаётган ислоҳотлар ва халқаро ҳамкорликни кенгайтириш йўлидаги саъй-ҳаракатларнинг амалий самарасидир.
Халқаро рейтингда Осиёнинг 26 мамлакатидан 1700 дан ортиқ университет иштирок этган. Рейтинг мезонлари илмий салоҳият, халқаро нуфуз, битирувчиларнинг бандлик даражаси, ўқув жараёнининг сифат кўрсаткичлари ҳамда халқаро ҳамкорлик фаолиятига асосланади.
Ғ. Ҳасанов, ЎзА
