“Aquatherm Tashkent-2026”: Туркия компанияси Ўзбекистон бозоридаги фаолиятини кенгайтирмоқда
Юртимизда қурилиш ва шаҳарсозлик соҳасининг жадал ривожланиши иситиш, вентиляция, сув таъминоти, сантехника ҳамда бошқа муҳандислик тизимларига бўлган талабни ҳам оширмоқда. Айниқса, замонавий ва энергия тежамкор ечимларни жорий этиш янги қурилиш лойиҳаларининг муҳим йўналишларидан бирига айланяпти.
Бу жараёнда халқаро компанияларнинг Ўзбекистон бозорига кириб келиши ва маҳаллий ҳамкорлар билан алоқаларни кенгайтириши соҳадаги янги технология ва тажрибаларни жалб этиш имконини бермоқда.
Пойтахтимизда ўтказилаётган “Aquatherm Tashkent-2026” халқаро кўргазмаси ҳам иситиш, вентиляция, сув таъминоти ва бошқа йўналишлардаги замонавий ечимларни намойиш этиш учун муҳим майдон бўлмоқда.
[gallery-31818]
Кўргазмада иштирок этаётган “Ayvaz” компанияси экспорт савдоси бўйича мутахассиси Гулнора Иброҳимли ҳам мазкур тадбирнинг аҳамияти ҳақида ўз фикрларини билдирди:
– “Ayvaz” компанияси 1948 йилда Туркияда ташкил этилган. Компания компенсаторлар, эгилувчан металл шланглар, беркитувчи арматуралар, ёнғин ускуналари, шунингдек, конденсат қопқонлари ва сатҳ ўлчагичлар ишлаб чиқаради.
Биз Тошкентдаги “Ўзэкспомарказ” марказий кўргазмалар мажмуида ўз ишини бошлаган “Иситиш, вентиляция, ҳавони иситиш ва совутиш, сув таъминоти, сантехника, бассейнлар, атроф-муҳитни муҳофаза қилиш технологиялари, муқобил энергия манбалари – Aquatherm® Tashkent-2026” халқаро кўргазмасида иштирок этяпмиз. Бу йил “Ayvaz” компанияси ушбу кўргазмада биринчи марта қатнашмоқда. Жорий йилдан бошлаб Тошкентдаги янги ваколатхонамиз - “Yuroturk” ҳам ўз фаолиятини бошлади.
“Aquatherm” кўргазмасидан катта умидларимиз бор. Бу ерда кўплаб янги мижозлар билан танишиш ва ҳамкорлик алоқаларини йўлга қўйишни истаймиз. Кўргазма компаниямиз маҳсулотларини тақдим этиш, потенциал ҳамкорлар билан мулоқот қилиш ва Ўзбекистонда янги лойиҳаларни йўлга қўйиш учун яхши имконият.
Айниқса, “Янги Тошкент” лойиҳасининг амалга оширилаётгани биз учун янги имкониятларни очмоқда. Янги Тошкент қурилмоқда. Шунинг учун биз ушбу лойиҳада ҳамкор бўлишни ва Ўзбекистонда янада кўпроқ, сифатли лойиҳаларни амалга оширишда иштирок этишни кутяпмиз.
Кўргазма доирасида биз компаниямиз маҳсулотларини маҳаллий мутахассислар ва потенциал ҳамкорларга тақдим этиб, Ўзбекистондаги янги лойиҳаларда иштирок этиш имкониятларини ўрганяпмиз. “Aquatherm Tashkent-2026” эса янги мижозлар билан мулоқот қилиш ва ҳамкорлик алоқаларини йўлга қўйиш учун муҳим майдон, – деди Гулнора Иброҳимли.
Насиба Зиёдуллаева,
Ойбек Пардаев (сурат),
ЎзА
