АҚШ Эрон юк кемасини қўлга олди, кескинлик кучайди (+видео)
АҚШ президенти Дональд Трамп Эронни сулҳ келишуви шартларини бузишда айблаб, яна бир бор мамлакатнинг муҳим инфратузилмаси —кўприклар ва электр станцияларини йўқ қилиш билан таҳдид қилди, деб хабар қилди ВВС нашри.
Эрон эса, ўз навбатида, Америка ҳарбийлари Эрон байроғи остидаги юк кемасини қўлга олганидан кейин АҚШни келишувни бузишда айблади.
Шунингдек, Ҳурмуз бўғози ҳали ҳам ёпиқ қолмоқда. Трампнинг айтишича, узунлиги тахминан 275 метрлик йирик юк кемаси АҚШнинг денгиз блокадасини бузиб ўтишга уринган, аммо Америка ҳарбий кемаси уни тўхтатган. Трампнинг айтишича, кема тўхтамагани учун унга зарба берилган ва ҳозир у АҚШ назорати остида.
Америка томони кемани текшираётганини маълум қилди. Эрон эса буни “қаллоблик” ва “келишувни бузиш” деб атаб, жавоб қайтаришини билдирди.
Юз берган кескинлик сабаб АҚШ ва Эрон ўртасидаги навбатдаги музокаралар тақдири ҳам ноаниқ бўлиб қолмоқда. Музокаралар шу ҳафта Покистонда ўтиши керак эди.
Трамп Америка вакилларини Исломободга йўл олганини айтди ва Эронга адолатли келишув таклиф қилаётганини билдирди. Шу билан бирга, агар келишув бўлмаса, Эрондаги барча электр станциялари ва кўприкларга зарба бериш билан яна таҳдид қилди.
Аввал ҳам Трамп шундай таҳдидлар қилган, шундан сўнг икки томон икки ҳафталик танаффусга келишиб, музокараларни бошлаган эди.
Айни кунларда, Эрон яна Ҳурмуз бўғозида ҳаракатни чеклади ва АҚШ блокадаси бекор қилинмагунча у ёпиқ қолишини билдирди. Эрон ҳарбийлари ҳатто айрим нефть танкерларини ортга қайтарган.
Дам олиш кунлари давомида бўғозда вазият янада кескинлашди: айрим кемаларга ўқ узилгани ҳақида хабарлар бор. Нефть танкери ва контейнер кемасига ҳужум қилингани айтилмоқда, аммо экипаж хавфсиз экани маълум қилинган.
Ҳозирда кузатув маълумотларига кўра, Ҳурмуз бўғози орқали деярли ҳеч қандай кема ҳаракатланмаяпти, кўпчилиги эса Форс кўрфази атрофида тўхтаб турибди.
<iframe width="650" height="420" src="https://www.youtube.com/embed/dlNLwoeI4xY" title="AQSH Eron yuk kemasini qo‘lga oldi, keskinlik kuchaydi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Улуғбек Тўхтаев, ЎзА
