Андрей Кондрашов: Сенімді ақпарат пен ортақ тарих – медиа ынтымақтастықтың негізі
Ташкентте өтіп жатқан III Өзбекстан – Ресей медиа форумы аясында Ресейдің ТАСС ақпарат агенттігінің бас директоры Андрей Кондрашов екі ел арасындағы байланысты нығайтудағы бұқаралық ақпарат құралдарының рөлі, қазіргі медиа саласының алдында тұрған міндеттер және бірлескен жобалардың келешегі туралы ой бөлісті.
Ол әуелі Ресейдің Өзбекстан үшін маңызды стратегиялық серіктес әрі одақтас екенін атап өтіп, екі елді саяси-экономикалық байланыстар ғана емес, миллиондаған адамның тағдыры, ортақ тарих пен көпжылдық достық сабақтастырып отырғанын еске салды.
Шынында да, ортақ тарихи жадымыз – екі халықтың рухани мұрасының бір бөлігі. Сондықтан оны көздің қарашығындай сақтап, келер ұрпаққа жеткізу қажет дүние. Сондықтан, бұл тұрғыда бұқаралық ақпарат құралдарына үлкен жауапкершілік жүктеледі. Ортақ тарих туралы әңгіме қозғалғанда, ол құрғақ деректер мен даталарды тізумен шектелмеуі керек. Оны жас ұрпаққа кеңінен таныту үшін әлеуетті мақалалар мен деректі фильмдерді, архив материалдары мен заманауи цифрлық форматтарды тиімді пайдалану тиімді нәтиже бермек.
ТАСС басшысы Өзбекстан туралы шынайы әрі мазмұнды ақпаратты Ресей аудиториясына жеткізу, сондай-ақ өзбекстандық оқырман мен көрерменді Ресейде болып жатқан оқиғалардан бейтарап хабардар ету маңызды екенін айтты. Әсіресе, бүгінгі цифрлық ортада ақпараттың сенімділігі айрықша мәнге ие. Әлеуметтік желілер мен цифрлық платформаларда мәлімет өте жылдам таралады. Алайда ақпараттың жедел таралуы оның шындыққа сай екенін білдірмейді. Тексерілмеген хабарлар, манипуляция мен жалған мәлімет аудиторияны жаңылыстыруы мүмкін.
Қазіргі жасанды интеллект технологияларының дамуы бұл мәселені одан әрі күрделендіріп отыр. Бүгінде қандай да бір оқиғаны немесе белгілі бір адамның сөзін бейнелейтін жалған сурет, аудио және бейнематериал жасау қиын емес. Сондықтан журналист ақпарат көзін мұқият тексеріп, нақты дерекке сүйенуі және редакция жауапкершілігіне барынша қатаң қарауы тиіс.
Ресей өкілі мәдени мұраны сақтау мен ұлттық құндылықтарды дәріптеу бағытында да екі елдің медиа ұйымдары үшін мол мүмкіндік бар екенін атап өтті. Осы орайда бірлескен деректі және көркем фильмдер түсіру, тарихи даталарға арналған арнайы жобалар әзірлеу, екі елдің мәдениеті туралы материалдарды көбейту жөнінде ұсыныс білдірді. Бұл ретте ТАСС архивінде сақталған фотосуреттер құнды дереккөз бола алады.
Сонымен қатар туризм, спорт, білім және жастар алмасуына арналған бірлескен медиа жобаларды дамыту да келешегі зор бағыттардың бірі ретінде аталды. Мамандардың пікірінше, белгілі бір қала, дарынды жас ғалым, спортшы немесе кәсіпкер туралы сапалы репортаж екі ел аудиториясының өзара қызығушылығын арттырып, ресми хабарларға қарағанда оқырман мен көрерменге әлдеқайда әсерлі жетуі мүмкін.
Сөз соңында Андрей Кондрашов екі елдің медиа құрылымдары арасындағы ынтымақтастықты жүйелі түрде дамыту қажеттігіне назар аударып, III Өзбекстан – Ресей медиа форумы жаңа байланыстар орнатуға, нақты бастамалар көтеріп, бірлескен жобаларды жүзеге асыруға жол ашатын маңызды алаң болатынына сенім білдірді.
Д.Хакимов Ф.Абдурасулов (сурет), ӨзА
