Алоҳида таълим эҳтиёжлари бўлган болалар учун давлат ихтисослаштирилган таълим муассасаларида тарификация рўйхатларини шакллантириш тартиби белгиланди
Адлия вазирлиги Алоҳида таълим эҳтиёжлари бўлган болалар учун давлат ихтисослаштирилган таълим муассасаларида синфларни комплектлаш ҳамда тарификация рўйхатларини шакллантириш тартиби тўғрисидаги идоравий ҳужжатни давлат рўйхатидан ўтказди.
Низомга кўра, махсус педагоглар учун аниқ малака талаблари жорий этилди.
Хусусан, улар коррекцион педагогика ва дефектология йўналишида олий маълумотга эга бўлиши ҳамда ўқувчиларнинг эҳтиёжига мос махсус методикаларни (имо-ишора тили, Брайль алифбоси, нутқ нуқсонларини бартараф этиш усуллари) билиши шарт.
Ҳужжатда дарс соатларини тақсимлашнинг устувор тартиби ҳам белгиланди.
Унга кўра, дарс юкламалари аввало малака тоифаси юқори бўлган, миллий ёки халқаро сертификатларга эга педагогларга берилади.
Шунингдек, 1 педагог учун юклама одатда 0,5 ставкадан кам ва 1 ставкадан ортиқ бўлмаслиги, айрим ҳолатларда эса 1,5 ставкагача рухсат этилиши назарда тутилган.
Низом билан тарификация рўйхатини шакллантириш, кўриб чиқиш ва тасдиқлашнинг аниқ муддатлари белгиланди.
Жумладан, дарс соатлари 17 сентябрга қадар электрон тизимга киритилади, 25 сентябрга қадар эса ваколатли орган томонидан тасдиқланади.
Шербек Исломов, ЎзА
