123 мингдан ортиқ фуқаро шубҳали харидорлар реестрига киритилди
Солиқ қўмитасининг маълум қилишича, жорий йилнинг май ойи учун ҳисобланган кешбэк маблағлари 25 июндан кейин тасдиқланади. Кешбэк маблағлари тасдиқланиши учун фуқаролар «Soliq» мобил иловасида шахсини тасдиқдан ўтказган бўлиши лозим.
Тасдиқланган кешбэк маблағларини белгиланган тартибда банк картасига ўтказиб олиш мумкин.
Агар харид қилинган товар ёки хизматни сотган тадбиркор солиқ ҳисоботини тақдим этмаган бўлса, ҳисоботда камчиликлар мавжуд бўлса ёки унинг солиқ қарзи тўланмаган бўлса, кешбэк маблағи мазкур камчиликлар бартараф этилгандан кейин автоматик равишда тасдиқланади.
Қуйидаги ҳолатларда харид чеки учун кешбэк берилмайди. Жумладан, чек берилганига 10 кундан ортиқ вақт ўтган бўлса, автомобиль, ҳаво ва темир йўл чипталари харид қилинганда, шунингдек алоқа ва коммунал хизматлар учун тўлов чекларида, ўзини ўзи банд қилган шахслар томонидан кўрсатилган хизматлар учун, якка тартибдаги тадбиркорлар ва ўзини ўзи банд қилган шахслар томонидан рақамли платформалар орқали берилган чекларда, жисмоний шахс шубҳали харидорлар реестрига киритилган бўлса кешбэк берилмайди.
Амалдаги тартибга кўра, бошқа шахсга тегишли онлайн-назорат касса техникаси чекини унинг розилигисиз рўйхатдан ўтказган, ҳуқуқбузарлик содир этган ёки кешбэк олиш ҳуқуқидан ноқонуний фойдаланган жисмоний шахслар шубҳали харидорлар реестрига киритилади.
Вазирлар Маҳкамасининг 2022 йил 12 майдаги 255-сонли қарорига мувофиқ, бундай шахсларга нисбатан белгиланган чекловлар қўлланилади.
Жорий йилнинг май ойида ижтимоий тармоқлар орқали муайян ҳақ эвазига учинчи шахслардан «сохта» харид чекларини олган, амалда харид қилинмаган товарлар учун чекларни рўйхатдан ўтказган 123 мингдан ортиқ фуқаро шубҳали харидорлар реестрига киритилган.
Қайд этилишича, сохта чеклар орқали бюджет маблағларини ноқонуний ўзлаштиришга уриниш қонунчиликка зид ҳисобланади ва бундай ҳаракатлар учун жавобгарлик белгиланган.
Фуқаролардан «Soliq» мобил иловасида фақат ўзлари амалга оширган харидлар учун берилган фискал чекларни рўйхатдан ўтказиш, бошқа шахслар томонидан тақдим этилган сохта чеклардан фойдаланмаслик сўралмоқда.
Ш.Маматуропова, ЎзА
