10 нафар шахматчимиз Осиё чемпионатида жаҳон кубоги йўлланмаси учун курашади
Шахмат бўйича Ўзбекистон терма жамоасининг 10 нафар аъзоси жорий йилнинг 28 май-7 июнь кунлари Мўғулистон пойтахти Улан-Баторда эркаклар ва аёллар ўртасида ўтадиган Осиё чемпионатида иштирок этади.
FIDE тақвимидан ўрин олган мазкур мусобақанинг аёллар баҳсларида Афрўза Ҳамдамова, Гулруҳбегим Тоҳиржонова, Гулдона Каримова, Нилуфархон Имомқўзиева, Мадинабону Халилова ва Асал Салимова, эркаклар баҳсида эса Абдумалик Абдусалимов, Хумоюн Бекмуратов, Ортиқ Нигматов, Саидакабар Саидалиев дона суради.
Чемпионат низомига мувофиқ, очиқ биринчиликда энг яхши кўрсаткичга эга бўлган 5 нафар шахматчи 2027 йилги Жаҳон кубоги йўлланмасини қўлга киритса, 1 нафар энг яхши аёл шахматчи аёллар ўртасидаги жаҳон кубоги иштирокчиси ҳуқуқига эга чиқади.
Осиё чемпионатининг эркаклар гуруҳида 28 та мамлакатнинг 147 нафар спортчиси, аёллар баҳсида 17 та давлатнинг 101 нафар шахматчи хотин-қизлари ғолиблик йўлида кураш олиб бориш учун рўйхатдан ўтган.
Умумий мукофот жамғармаси 100 минг АҚШ долларидан иборат қитъа биринчилиги 9 та турдан иборат этиб белгиланган.
Т.Рўзиев,
ЎзА
