Joriy yil 19-22 mart kunlari Ispaniyaning Saragosa shahrida boʻlib oʻtadigan “Figan-2019” xalqaro koʻrgazmasida ishtirok etish uchun fermer xoʻjaliklari rahbarlari tayyorgarlik koʻrishmoqda.

Joriy yil 19-22 mart kunlari Ispaniyaning Saragosa shahrida boʻlib oʻtadigan “Figan-2019” xalqaro koʻrgazmasida ishtirok etish uchun fermer xoʻjaliklari rahbarlari tayyorgarlik koʻrishmoqda.

- Saragosada boʻladigan bu koʻrgazma qishloq xoʻjaligi sohasida har ikki yilda bir marotaba oʻtkaziladigan dunyodagi eng yirik maydonlardan biri hisoblanadi, – deydi Oʻzbekiston fermer, dehqon xoʻjaliklari va tomorqa yer egalari kengashi huzuridagi “Qishloq biznesi uchun maslahat” unitar korxonasi direktori F.Fazliyev. – Unda agroenergiya, chorvachilik, chorva mollarining sogʻligini saqlash, ularni oziqlantirish va genetikasi, oʻrmon xoʻjaligi, baliqchilik, mahsulotlarni qayta ishlashga oid texnologiyalar namoyish qilinadi. Shuning uchun ham u soha mutaxassislari uchun muhim koʻrgazmalaridan biri hisoblanadi.

Koʻp tarmoqli fermer xoʻjaliklari faoliyatida bunday koʻrgazmalarning muhimligini inobatga olib, ilgʻor fermerlarimizni mana shu koʻrgazmaga safarbar qilmoqdamiz. Zero, bunday koʻrgazmalar mamlakat sanoatining ham rivojlanishida muhim rol oʻynaydi.

Qayd etish joizki, “Qishloq biznesi uchun maslahat” unitar korxonasining asosiy faoliyati fermer, dehqon xoʻjaligi rahbarlarini sohaga oid ilm-fan yutuqlarining zamonaviy, eng soʻnggi yangiliklari bilan oshno qilishdek ulugʻ maqsadlarga yoʻgʻrilgan. Ushbu tashkilotda bugungi kundagi ishlar aynan shu talabdan kelib chiqib tashkil etilgan.

- Ilm-fanning bugungi kundagi taraqqiyoti har bir soha vakillaridan tinimsiz oʻqish, izlanishni talab qiladi, – deydi F.Fazliyev. – Biz ham shu tamoyilni oʻzimizga ustuvor vazifalardan biri qilib belgilab olganmiz. Fermer va dehqon xoʻjaliklari rahbarlarining malakasini tinimsiz oshirish, dunyodagi ilgʻor tajribalarni oʻrgatish borasida bir qator yumushlarni amalga oshirmoqdamiz.

Darhaqiqat, dunyo bilan boʻylashishni istasak dunyoda boʻlayotgan yangiliklardan doimo xabardor boʻlib turishimiz kerak. Unitar korxonaning izlanishlari va saʼy-harakati mamlakatimizning fermer xoʻjaliklari rahbarlarining dunyoqarashi, tushunchasini amaliy tajribalari uygʻunlashtirishi mamlakatimizda soha taraqqiyotiga xizmat qiladi.