Farg‘onada oliy o‘quv yurtlari talabalari o‘rtasida o‘tkaziladigan Universiada sport musobaqalariga qizg‘in tayyorgarlik ko‘rilmoqda. Sport inshootlari qayta ta’mirdan chiqarilib, barcha sharoit yaratilmoqda.

Farg‘onada oliy o‘quv yurtlari talabalari o‘rtasida o‘tkaziladigan Universiada sport musobaqalariga qizg‘in tayyorgarlik ko‘rilmoqda. Sport inshootlari qayta ta’mirdan chiqarilib, barcha sharoit yaratilmoqda. Ishtirokchilarning vaqti maroqli o‘tishi uchun ishlab chiqilgan turli ma’naviy-ma’rifiy tadbirlar dasturi doirasida taniqli sportchilar, adiblar, olimlar, madaniyat va san’at namoyandalari bilan uchrashuvlar, shaharning diqqatga sazovor joylariga sayohatlar, shou-konsertlar tashkil etish rejalashtirilgan.

Prezidentimiz tashabbusi bilan joriy etilgan uch bosqichli uzluksiz tizim – “Umid nihollari”, “Barkamol avlod” va Universiada o‘yinlari o‘quvchi va talaba-yoshlar o‘rtasida sportning ommaviyligini oshirish hamda iste’dodli yoshlarni kashf etish va qo‘llab-quvvatlashda muhim omil bo‘lmoqda.

Musobaqalar bo‘lib o‘tadigan “Istiqlol” stadioni, tennis korti, Farg‘ona davlat universiteti, Farg‘ona politexnika instituti, Olimpiya zaxiralari kolleji sport zallari zamon talablari asosida ta’mirdan chiqarildi, zarur sport jihozlari bilan ta’minlandi. Ayni paytda musobaqa ishtirokchilarining yashashi, ovqatlanishi va mazmunli dam olishi uchun qulay sharoit yaratish maqsadida keng ko‘lamli ishlar amalga oshirilmoqda. Talabalar turar joylarida barcha qulayliklar yaratilmoqda. Komputer, faks va telefon bilan ta’minlangan axborot markazlari tashkil etilmoqda.

– Nufuzli musobaqaga har tomonlama puxta taraddud ko‘rmoqdamiz, – deydi Farg‘ona politexnika instituti rektori Oybek Otaqulov. – “Universiada – 2016” musobaqalarini yuksak saviyada o‘tkazish uchun aniq chora-tadbirlar belgilab olganmiz. Hududlarni obodonlashtirishga ham alohida e’tibor qaratilmoqda.

Farg‘ona shahrining Alisher Navoiy, Aeroport, Sayilgoh, Ahmad Farg‘oniy kabi markaziy ko‘chalari yanada chiroy ochmoqda. Shahar ko‘chalari Universiada, yoshlik va sportni ulug‘lovchi shiorlar va lavhalar bilan bezatilmoqda. Mehmonlarni kutib oladigan aeroportdan tortib ishtirokchilar joylashadigan manzillar ko‘rkam qiyofa kasb etayotir. Farg‘ona Olimpiya zaxiralari kollejida yoshlik va nafosat bayramini yuqori saviyada tashkil etishga katta tayyorgarlik ko‘rilmoqda. Kollej hududida ta’mirlash ishlari olib borilayotir. Hududga turli manzarali daraxt ko‘chatlari va turfa gullar ekildi. Ko‘kalamzorlashtirish-obodonlashtirish ishlarida kollejning ishchi-xodimlari faol qatnashmoqda.

Musobaqalarning asosiy ochilish tantanalari yangi bunyod etilgan “Istiqlol” stadionida bo‘lib o‘tadi.

– Universiada dasturiga Olimpiada sport turlari – yunon-rum va erkin kurash, boks, og‘ir atletikaning kiritilishi iqtidorli yoshlar uchun yanada keng imkoniyatlar yaratadi, – deydi Farg‘ona davlat universiteti jismoniy madaniyat va sport fakulteti dekani Rasuljon Hamroqulov. – Sport musobaqalarining saralash bahslarida 5 oliy o‘quv yurtining eng mahoratli talabalari tanlab olinib, viloyat terma jamoasi shakllantirildi. Ayni paytda tayyorgarlik mashg‘ulotlari kuniga ikki marta o‘tkazilayotir. Namanganda bo‘lib o‘tgan sport o‘yinlarining futbol, voleybol, basketbol, qo‘l to‘pi va boks bo‘yicha hududiy saralash musobaqalarida viloyatimiz vakillari yaxshi natijalarni qo‘lga kiritdi.

Viloyatdan taekvondo bo‘yicha Abubakir Rahimov, boks bo‘yicha Akmal Qosimov, yunon-rum kurashida Diyorbek Sharipov, yengil atletikachilar Nozima Abdug‘afforova, Feruza Madaminova, suzish bo‘yicha Malika Azimova singari 140 ga yaqin talaba Universiada musobaqalarida qatnashadi. Ular bor kuch va mahoratini ishga solib, viloyat sport sharafini munosib himoya qilishga bel bog‘lagan.

Farg‘ona politexnika institutida shaxmat, stol tennisi musobaqalari o‘tkaziladigan zal rekonstruksiya qilinib, tayyor holga keltirildi. Institutning ushbu musobaqalarda qatnashuvchi 42 talabasi muntazam mashg‘ulotlarga jalb qilingan. Sportning basketbol turi bo‘yicha murabbiylar Azizaxon Saidova, Jamshid Malikov shogirdlari tayyorgarligini nazorat qilib bormoqda.