O‘zA O`zbek

10.12.2019 Chop etish versiyasi

Madhiyang yangrayversin, jonajon yurtim!

Madhiyang yangrayversin, jonajon yurtim!

Nukusda 10 dekabr – O‘zbekiston Respublikasining Davlat madhiyasi qabul qilingan kun munosabati bilan bayram tadbiri tashkil etildi. 

“O‘zbekiston Respublikasining davlat madhiyasi to‘g‘risida”gi qonun 1992 yil 10 dekabrda O‘zbekiston Respublikasi Oliy Kengashining o‘n birinchi sessiyasida qabul qilinib, ushbu sana har yili keng nishonlanib kelinmoqda.

Qonunda belgilanganidek, madhiyamiz davlat suverenitetining ramzi hisoblanadi, unga zo‘r ehtirom bilan qarash har bir fuqaroning vatanparvarlik burchidir. 

Mustaqillik yillarida xalqimizning ma’naviyatini yuksaltirish, yoshlarni vatanparvarlik ruhida tarbiyalash masalalariga alohida e’tibor qaratilmoqda. O‘zbekiston Respublikasining madhiyasi yoshlarda Vatanga muhabbat, boy tariximizga, milliy o‘zligimizga chuqur hurmatni shakllantirishda, farzandlarimizning har tomonlama barkamol va yetuk insonlar bo‘lib voyaga yetishida muhim tarbiyaviy vosita bo‘lib xizmat qilmoqda.

Mustaqil mamlakatimiz yuksak taraqqiyot, buyuk kelajak barpo etish sari odimlashda davom etadi, ulug‘ xalqning mangu qushig‘i – madhiyamiz xalqimiz, farzandlarimiz qalbidan chuqur joy olib, olam uzra baralla yangrayveradi. Madhiyamiz ona Vatanimizdan g‘ururlanishga, mustaqilligimizni mustahkamlashga, bugunimizning qadriga yetishga, yangi marralarni zabt etishga undayveradi.

– Madhiya – qalbida o‘z Vataniga muhabbat va sadoqat tuyg‘usi bor har qanday kishida milliy g‘urur, o‘ziga xos faxr, eng muhimi yurtga mehr uyg‘otadi, – deydi respublika Ma’naviyat va ma’rifat markazi Qoraqalpog‘iston bo‘limi rahbari Q.Yusupov. – Bu milliy timsolda xalqning o‘tmishi, buguni va kelajagi, shuningdek, ziynati, orzu-o‘yi, maslak-maqsadi mujassam. 

Tadbir san’at ustalari va yosh ijrochilarning konsert dasturi bilan davom etdi. 

Bu kadi ma’naviy-ma’rifiy tadbirlar Orolbo‘yining barcha shahar va tumanlarida bo‘lib o‘tmoqda.

1 785
Dovud ABIBULLAEV, Maqsad HABIBULLAEV (surat), O‘zA