O‘zA O`zbek

05.01.2018 18:00 Chop etish versiyasi

Endilikda Buxoro, Samarqand, Xorazm va Qashqadaryo viloyatlari IIBda vaziyat markazlari faoliyat ko‘rsatadi. Ularning vazifasi nima?

Mamlakatimizda 7 ming 300 dan ortiq madaniy meros obyekti mavjud va ularning aksariyati YuNESKO ro‘yxatiga kiritilgan.

Bu O‘zbekistonning turizm sohasida ulkan salohiyatga ega bo‘lgan davlat hisoblanishini ko‘rsatadi. Shu bois ham Prezidentimiz Shavkat Mirziyoyev Oliy Majlisga Murojaatnomasida bu masalaga alohida e’tibor qaratib, hozirgi kunda milliy iqtisodiyotga yuqori daromad keltiradigan istiqbolli tarmoqlardan biri – bu turizm ekanini ta’kidladi.

Darhaqiqat, turizm mamlakatimiz iqtisodiyotini rivojlantirish, yangi ish o‘rinlari yaratishda muhim yo‘nalishlardan hisoblanadi. Shuning uchun ham mamlakatimizning barcha hududlarida sayyohlik sohasida istiqbolli loyihalar amalga oshirilmoqda.

«Xavfsiz turizm» loyihasi shulardan biri bo‘lib, yurtimizga kelgan sayyohlar va mehmonlarning xavfsizligini ta’minlash, ular uchun zamonaviy sharoitlar yaratish chora-tadbirlarini ko‘zda tutadi.

O‘zbekiston Respublikasi Vazirlar Mahkamasining 2017-yil 23-noyabrdagi “Buxoro, Samarqand, Xiva va Shahrisabz shaharlarida xavfsiz turizmni ta’minlash chora-tadbirlari to‘g‘risida”gi qarori bilan xavfsiz turizmni ta’minlash konsepsiyasi tasdiqlandi.

Qarorga ko‘ra xavfsiz turizmni ta’minlash konsepsiyasini amalga oshirish bo‘yicha komissiya tuzildi. Mazkur komissiya tomonidan konsepsiyaning asosiy yo‘nalishlarini bosqichma-bosqich amalga oshirish bo‘yicha «yo‘l xaritalari» tasdiqlandi.

2017-2020-yillarda Buxoro, Samarqand, Xiva va Shahrisabz shaharlarida xavfsiz turizmni ta’minlash konsepsiyasini amalga oshirishga doir tashkiliy chora-tadbirlar dasturi ham tasdiqlandi.

Qaror ijrosini ta’minlash maqsadida turizm xavfsizligini ta’minlash bo‘yicha ichki ishlar organlari faoliyati takomillashtirildi. Endilikda Buxoro, Samarqand, Xorazm va Qashqadaryo viloyatlari IIBda vaziyat markazlari faoliyat ko‘rsatadi. Ular xavfsiz turizm holatini monitoring qilish, sayyohlarni real vaqt rejimida potensial xavflardan xabardor etish hamda ularning huquq va qonuniy manfaatlarini himoya qilishga yordamlashish bilan shug‘ullanadi.

Hozirgi kunda Buxoro, Samarqand, Xorazm va Qashqadaryo viloyatlari ichki ishlar boshqarmalarida xavfsiz turizmni ta’minlash bo‘yicha boshqarmalar tashkil etildi va mazkur boshqarmalar boshliqlari tayinlandi. Ular, o‘z navbatida, viloyat IIB boshliqlarining o‘rinbosari hisoblanadi. Yangi tashkil etilgan boshqarmalarga xorijiy tillarni mukammal biladigan xodimlar ishga qabul qilingan.

Aytib o‘tish kerakki, mamlakatda bo‘lib turgan davrda sayyohlar xavfsizligini, transportdan foydalanish va ko‘chishlarini ta’minlash bo‘yicha turizm sohasida xizmatlar ko‘rsatuvchi va yetib kelgan sayyohlar hisobini yurituvchi davlat va nodavlat tashkilotlarning yagona axborot bazasini shakllantirish rejalashtirilmoqda.

Buxoro, Samarqand, Xiva va Shahrisabzdagi transport infratuzilmalari va xizmat ko‘rsatish sohasi obyektlarida plakatlar, belgilar va ko‘rsatkichlar o‘rnatilmoqda.

Mobil ilova sayyohlarni mamlakatimizda bo‘lish qoidalari, viza va ro‘yxatga olish jarayonlari, diqqatga sazovor manzillar va yo‘nalishlar, shuningdek, yaqin ichki ishlar organi tayanch punktlari va tibbiyot muassasalari to‘g‘risida xabardor qilib turadi. Mazkur mobil ilovada sayyoh huquqni muhofaza qilish organlariga mushkul vaziyatga tushib qolganlik to‘g‘risida xabar yuborishi yoki o‘z mamlakatining konsullik idorasiga murojaat yozishi mumkin.

Yashash joyi xavfsizligini ta’minlash, mehmonxonaga joylashish va sayyohlarga xizmat ko‘rsatish sohasida har bir mehmonxonada yetib kelgan sayyohlarning ma’lumotlar bazasini shakllantirishga imkon beruvchi «E-mehmon» elektron axborot tizimi joriy etilmoqda. Mehmonxonalarga kirish joyi kunu tun videokuzatuv ostida bo‘ladi.

Bundan tashqari, «Xavfsiz turizm» yagona apparat-dasturiy majmuasi joriy etiladi. Bu videokuzatuv, ma’lumotlarni tahlil qilish va avtomat ravishda qayta ishlash, huquqbuzarliklar va hodisalar to‘g‘risidagi xabarlarni qabul qilish va ro‘yxatga olish tizimi hisoblanadi.

Turistik diqqatga sazovor maskanlarga tashrif buyurgan sayyohlar va rasmiy xorijiy delegatsiyalar xavfsizligini ta’minlash va kechki ko‘ngilochar dasturlarni tashkil etish sohasida sayyohlarni individual himoya qilish bo‘yicha maxsus texnik vositalarga bo‘lgan talablarni ishlab chiqish va o‘rnatish ham belgilangan.

Qutbiddin Burhonov,
O‘zbekiston Respublikasi IIV
Jamoatchilik va ommaviy axborot vositalari
bilan aloqalar boshqarmasi boshlig‘i –
ichki ishlar vazirining matbuot kotibi.

O‘zA
12 526