O‘zA O`zbek

12.07.2019 13:56 Chop etish versiyasi

Bahodirjon Sidiqov: Tabiiy gaz narxi o‘zgaradi, lekin...

Bahodirjon Sidiqov: Tabiiy gaz narxi o‘zgaradi, lekin...

Avval xabar berganimizdek, O‘zbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligida Energetika vazirligi, “O‘zbekneftgaz” AJ, “O‘ztransgaz” AJ rahbar xodimlari ishtirokida matbuot anjumani bo‘lib o‘tdi.

Unda mutaxassislar Prezidentimizning 2019 yil 9 iyuldagi “Aholi va iqtisodiyotni energiya resurslari bilan barqaror ta’minlash, neft-gaz tarmog‘ini moliyaviy sog‘lomlashtirish va uning boshqaruv tizimini takomillashtirish chora-tadbirlari to‘g‘risida”gi qarori mohiyati va ijrosi yuzasidan ma’lumot berdi.

Mutaxassislarning ma’lum qilishicha, 2018 yil 13 milliard kub metr gaz eksport qilingan. Bugungi kunda O‘zbekistonda yiliga 61 milliard kub metr gaz qazib olinadi. Shundan 35-40 milliard kub metrini “O‘zbekneftgaz” AJ qazib oladi. Iste’molchilarga 35 milliard kub metr gaz yetkazib berilmoqda. Respublikaning ichki iste’moli esa 39-40 milliard kub metrni tashkil etadi. Qarorga ko‘ra, tabiiy gazni qazib olish hajmini keyingi yil 41 milliard kub metrga, 2024 yilda esa 42,3 milliard kub metrga olib chiqish rejalashtirilgan.

– O‘zbekiston Respublikasi Tiklanish va taraqqiyot jamg‘armasidan 2 milliard dollar atrofida qarzimiz bor, – dedi “O‘zbekneftgaz” AJ boshqaruvi raisi Bahodirjon Sidiqov. – Ushbu kreditni o‘z vaqtida to‘lab boryapmiz. “O‘zbekneftgaz” AJ 2017-2018 yillar zarar bilan chiqdi. Agarda bu yil sohada katta islohotlar bo‘lmaganida aksiyadorlik jamiyati yana moliyaviy zarar ko‘rardi. Bugungi kundagi “O‘zbekneftgaz” AJ muammolarini hal qilishimiz uchun gaz narxini ikki baravar oshirishimiz kerak. Shundagina muammolar ijobiy hal etiladi. Bu taklifni muhtaram Prezidentimizga olib kirdik. Qattiq tanbeh eshitdik. Endilikda o‘z imkoniyatimizdan kelib chiqib, yuqoridagi muammolardan qutilish yo‘lini izlayapmiz. Buning uchun davlat tomonidan bizga katta yordam berilmoqda. Mavjud muammoning 20 foizini tariflar oshirilishi orqali, qolgan 80 foizini davlatning moliyaviy yordami orqali hal qiladigan bo‘ldik. Ishlab chiqilayotgan tariflarda katta o‘zgarishlar bo‘lmaydi. Bu inflyatsiya darajasida bo‘ladi.

Xurshid QODIROV, O‘zA
510