Миразизбек Мирзахалилов коллекциясини Олимпиада олтини билан тўлдиришга аҳд қилган

Бокс бўйича терма жамоамиз вакиллари орасида Миразизбек Мирзахалиловдан ҳам катта натижалар кутмоқдамиз. Ўзбекистон Миллий олимпия қўмитаси “Улар Токиога боришади” лойиҳасининг ушбу сонида қувалик боксчи фаолияти ҳақида сўз юритилади.

Миразизбек Мирзакарим ўғли Мирзахалилов 1995 йил 27 февраль куни Фарғона вилоятида таваллуд топган. 2006 йилдан бокс билан шуғулланади. Мураббийи Баҳодир Эркаев.

Боксчимиз 2014 йилдан асосий ютуқларга эриша бошлаган. Мамлакат чемпионатидаги муваффақиятли иштирокдан сўнг терма жамоа таркибига қабул қилинди. -56 кг вазн тоифасида 2018 йил Индонезиянинг Жакарта шаҳрида ўтган Осиё ўйинларида, бир йил ўтиб Бангкокда ўтган Осиё чемпионатида олтин медални қўлга киритди. 2019 йил Россия Федерациясининг Екатеринбург шаҳри мезбонлик қилган дунё биринчилигида ҳам боксчимиз тенгсиз эканлигини исботлади. Унинг коллекциясидан Олимпиада олтин медалининг жой олиши қолган холос.

Жорий йилнинг 3 апрель куни “Ҳумо арена” муз саройи мезбонлик қилган профессионал бокс оқшомида ўз дебютини ўтказди ва муддатидан аввал ғалабага эришди.

М.Мирзахалилов ҳукуматимиз томонидан “Ўзбекистон ифтихори” фахрий унвони билан тақдирланган.

2020 йил Иорданияда ўтган Осиё-Океания лицензион мусобақасидаги иштироки орқали "Токио–2020" Олимпия ўйинларига йўлланма олган.