Вилоят ҳокими Э.Турдимов вилоятдаги давлат органлари раҳбарлари 11 ноябрдан 21 ноябрга қадар ишга пиёда ёки жамоат транспортида келиб кетишини таклиф қилди.

Бу давлатимиз раҳбарининг шу йил 30 октябрдаги “Соғлом турмуш тарзини кенг татбиқ этиш ва оммавий спортни янада ривожлантириш чора-тадбирлари тўғрисида”ги фармони ижроси юзасидан дастлабки ҳаракат бўлиши айтилди.

– Мен ўзим шу тартибда ишга келиб-кетаман, хизмат машинам ҳокимиятда туради, – деди Э.Турдимов. – Кун давомида бирор бир туманга чиқадиган бўлсам, машинадан фойдаланаман. Кечқурун яна машинани ҳокимият гаражида қолдириб, уйга пиёда ёки жамоат транспортида кетаман. Бу аввало саломатлигимиз учун, қолаверса, аҳолига шахсий ибратимиз бўлади. Яна бир томони – пиёда ёки жамоат транспортида юрсак, кўпроқ одамлар орасида бўламиз, жойлардаги реал ҳолатдан хабардор бўламиз. Бу ташаббус жамоатчилик томонидан қўллаб-қувватланишига умид билдирди вилоят ҳокими.

Ғ.ҲАСАНОВ, ЎзА