Oʻzbekiston Respublikasi Prezidenti Shavkat Mirziyoyev 28-avgust kuni avtomobil transporti sohasida boshqaruvni takomillashtirish, xalqaro xamkorlikni rivojlantirish, transport xizmatlari koʻlamini kengaytirish masalalari boʻyicha yigʻilish oʻtkazdi.

Oʻzbekiston Respublikasi Prezidenti Shavkat Mirziyoyev 28-avgust kuni avtomobil transporti sohasida boshqaruvni takomillashtirish, xalqaro xamkorlikni rivojlantirish, transport xizmatlari koʻlamini kengaytirish masalalari boʻyicha yigʻilish oʻtkazdi.

Maʻlumki, davlatimiz rahbarining 2018-yil 6-martdagi qaroriga muvofiq Oʻzbekiston avtomobil transporti agentligi qayta tashkil etilgan edi. Unga binoan 2018-2021-yillarda avtomobil transporti infratuzilmasini rivojlantirish dasturi qabul qilindi. Dastur ijrosi doirasida 50 dan ziyodyoʻlovchi tashish yoʻnalishi ochildi, 9 avtostansiya qurildi, 82 yangi avtobus sotib olindi. Qozogʻiston, Qirgʻiziston va Tojikistonga 5 xalqaro avtobus qatnovi yoʻlga qoʻyildi.

Yigʻilishda soha rivojiga toʻsiq boʻlayotgan bir qator muammolar ham mavjudligi qayd etildi. Tizimdagi islohotlarni izchil davom ettirish,zamonaviy transport xizmati koʻrsatish boʻyicha vazifalar belgilandi. Qishloqdan shahargacha, tumanlararo hamda shaharlararo yoʻnalishlarda transport xizmati koʻrsatish tizimi va infratuzilmasini yaxshilash yuzasidan topshiriq berildi.

Davlatimiz rahbarining koʻrsatmasiga binoan endilikda transport xizmati faoliyatini muvofiqlashtirish vazifasi davlat-xususiy sheriklik asosida xususiy operator-dispetcherlarga beriladi.

Litsenziyaga ega va tender gʻolibi boʻlgan xususiy operator-dispetcher tegishli hudud yoki yoʻnalishda shartnoma asosida barcha transport xizmati koʻrsatuvchilarni birlashtirib, ular uchun yagona platforma tashkil etadi. Xususiy operator-dispetcherlarga davlatga qarashli 10115 avtobekat, 17 avtovokzal va avtostansiya topshiriladi.

Shu munosabat bilan Oʻzbekiston Respublikasi Vazirlar Mahkamasi, tegishli vazirlik va idoralarga shu yil 1-dekabrgacha mazkur tizimni joriy etish vazifasi yuklandi.

Hisob-kitoblarga koʻra, mamlakatimizda har 10 ming fuqaroga 2 avtobus toʻgʻri keladi. Lekin hududlarda mazkur yoʻnalishlarning 30 foizdan ortigʻi ishlamayapti. Xalqaro yoʻlovchi tashishning bor-yoʻgʻi 6 foizi (12 avtobus, mavjud talab – 200 avtobus) qonuniy faoliyat yuritayotgan yoʻlovchi tashuvchilar tomonidan amalga oshirilmoqda.

Shu bois viloyatlarda 13 avtokorxona tashkil etish va ular uchun bu yil 400, keyingi yil oxirigacha 780 “Isuzu” avtobusi sotib olish kerak.

Yigʻilishda yuk tashish tizimiga xususiy sektorni jalb qilish, xizmat taklif etuvchi va mijozlarga ekspeditorlik xizmati koʻrsatishni joriy etish masalalari ham koʻrib chiqildi.

Bu tizim norasmiy ish yuritayotganlar faoliyatini legallashtirish, xizmat koʻrsatuvchilarga va mijozlarga qulaylik yaratish imkonini beradi.

Shu maqsadda Vazirlar Mahkamasi yuk tashuvchilarga litsenziya va ruxsat berish tartib-taomillarini tubdan qisqartirish, xususiy ekspeditorlik tashkilotlari faoliyatini tashkil etish boʻyicha qaror qabul qilishi kerak.

Tranzit yuk tashish bozorida raqobatbardoshlikni oshirish masalalari muhokama qilinar ekan, mamlakatimiz hududi orqali oʻtayotgan eksport-import va tranzit yuklarning atigi 11 foizi milliy tashuvchilar hissasiga toʻgʻri kelishi, magistral yoʻl infratuzilmasi rivojlanmayotgani, yoʻllarda yoqilgʻi quyish shoxobchalari va mehmonxonalar yetarli emasligi tanqid qilindi.

Mamlakatimiz orqali yuk tashishni koʻpaytirish uchun xorijiy davlatlar va yirik kompaniyalar bilan qoʻshimcha bitimlar imzolash, Trans-Afgʻon, Trans-Kavkaz, Trans-Xitoy kabi avtomobil yoʻllaridan foydalanishni jadallashtirish, yuk tashuvchilar bilan hamkorlikda korxonalar tashkil etish, sohaga oid xalqaro hujjatlarga qoʻshilish, tegishli qonun loyihasi ishlab chiqish vazifalari qoʻyildi.

Yoʻlovchi tashish xizmatlari koʻrsatish uchun tarif belgilash tartib-taomillari ham talabga javob bermasligi qayd etildi. Shahar avtobus yoʻnalishlarida tariflar viloyatlar oʻrtasida 1,7 barobar farq qiladi, yoʻnalishli taksi boʻyicha esa bu tafovut 6 barobardan ortadi.

Vazirlar Mahkamasi, Moliya vazirligi, “Oʻzavtotrans” agentligiva Davlat raqobat qoʻmitasi yoʻlovchi tashish xizmatlari uchun tariflarni davlat tomonidan belgilash tartibini takomillashtirishi zarur.

Transport xizmati koʻrsatish sohasiga axborot-kommunikatsiya texnologiyalarini jadal joriy etish lozim. Yoʻl haqi uchun pul toʻlash hamon eskicha tizimda qolmoqda. Misol uchun, Toshkent shahrida yoʻl kira uchun elektron toʻlov tizimini joriy etish 3 yildan buyon paysalga solib kelinayotgani tanqid qilindi.

Yigʻilishda poytaxtimizda yoʻlovchi tashish tizimi va infratuzilmasini takomillashtirish masalalari muhokama etildi. Toshkent koʻchalaridagi bekatlarda avtobuslarning kelib-ketish vaqtini koʻrsatuvchi elektron tablolar, bepul internet, avtobuslarda mobil ilovalar va videokuzatuv moslamalari yoʻq. Vaziyatni oʻnglash uchun Toshkent shahrida yoʻlovchi tashish transporti tizimini tubdan yangilash konsepsiyasi loyihasini ishlab chiqish zarurligi taʻkidlandi.