O‘zA O`zbek

31.08.2020 Chop etish versiyasi

Oʻzbekiston Respublikasining Mustaqilligi kuni munosabati bilan xorijiy davlatlar rahbarlari va taniqli arboblaridan qutlovlar

Oʻzbekiston Respublikasining Mustaqilligi kuni munosabati bilan xorijiy davlatlar rahbarlari va taniqli arboblaridan qutlovlar

Oʻzbekiston Respublikasi mustaqilligining 29 yilligi munosabati bilan Prezident Shavkat Mirziyoyev nomiga xorijiy davlatlar va hukumatlar, nufuzli xalqaro tashkilotlar rahbarlari, taniqli davlat, jamoat va din arboblaridan samimiy qutlovlar kelmoqda.

Ularda Oʻzbekistonning davlat va jamiyat qurilishida erishgan muvaffaqiyatlari, mamlakatning barqaror taraqqiyotini taʼminlash va aholi turmush darajasini oshirish, respublikamizning xalqaro maydondagi nufuzini mustahkamlashga qaratilgan keng miqyosli ijtimoiy-iqtisodiy islohotlar natijalari eʼtirof etilgan.

Maktublarda davlatimiz rahbari va Oʻzbekistonning koʻp millatli xalqiga farovonlik, tinchlik-osoyishtalik va ravnaq tilaklari izhor etilib, xalqaro hamjamiyat oldida turgan umumiy global xatarlar tez fursatda yengib oʻtilishiga ishonch bildirilgan.

******

Oʻzbekiston Respublikasi Prezidenti

Shavkat Mirziyoyev Janobi Oliylariga

Janobi Oliylari!

Mustaqillik kuni munosabati bilan Oʻzbekiston Respublikasi xalqiga samimiy tabriklarimni izhor etishga ijozat bergaysiz.

Birlashgan Millatlar Tashkilotining har bir aʼzosi oʻzining betakror madaniyati va tarixiga ega, ularning xilma-xilligi BMT va dunyoni boyitmoqda. Mamlakatingiz Birlashgan Millatlar Tashkiloti faoliyatida xalqaro kun tartibidagi barcha masalalar borasida ishtirok etishi juda ham muhim.

Joriy yilda, Barqaror taraqqiyot sohasidagi maqsadlarga erishish boʻyicha harakatlarning birinchi oʻn yilligida, barchaning manfaatiga xizmat qiladigan adolatli globallashuvni barpo etishda umumiy maqsadlarimizni kuchaytirishimiz lozim.

Dunyoni barcha uchun yana-da tinch, adolatli va barqaror qilishga intilar ekanmiz, bu boradagi barcha saʼy-harakatlarda Oʻzbekiston Respublikasining hissasi va koʻmagidan umidvorman.

Janobi Oliylari, Sizga boʻlgan eng yuksak ehtiromimni qabul qilgaysiz.

Antoniu Guterrish

Birlashgan Millatlar Tashkiloti Bosh kotibi

******

Oʻzbekiston Respublikasi Prezidenti

Shavkat Miromonovich Mirziyoyev Janobi Oliylariga

Muhtaram Shavkat Miromonovich!

Oʻzbekiston Respublikasining milliy bayrami – Mustaqillik kuni munosabati bilan samimiy tabriklarimni qabul qilgaysiz.

Oʻzbekistonning ijtimoiy va iqtisodiy sohalarda erishgan muvaffaqiyatlari barchaga maʼlum. Mamlakatingiz jahon maydonida eʼtirof etilgan obroʻ-eʼtibor qozongan, xalqaro kun tartibidagi dolzarb masalalarni hal etishda muhim oʻrin tutadi.

Rossiya-Oʻzbekiston munosabatlari strategik sheriklik va ittifoqchilik ruhida rivojlanib bormoqda. Ishonchim komil, birgalikdagi saʼy-harakatlar bilan koʻp qirrali ikki tomonlama munosabalarni doʻst xalqlarimiz farovonligi yoʻlida yana-da rivojlantiramiz.

Sizga, muhtaram Shavkat Miromonovich, sihat-salomatlik va davlat rahbari sifatidagi faoliyatingizda ulkan zafarlar, Oʻzbekistonning barcha fuqarolariga esa baxt-saodat va farovonlik tilayman.

Hurmat bilan,

Vladimir Putin

Rossiya Federatsiyasi Prezidenti

******

Oʻzbekiston Respublikasi Prezidenti

Shavkat Mirziyoyev Janobi Oliylariga

Hurmatli Prezident Janoblari!

Xitoy Xalq Respublikasi hukumati va xalqi nomidan, shaxsan oʻz nomimdan Sizni va Siz orqali birodar Oʻzbekiston xalqini davlat mustaqilligining 29 yilligi munosabati bilan samimiy tabriklashga ijozat bergaysiz.

Keyingi yillar Oʻzbekistonda Sizning zabardast rahbarligingizda turli yoʻnalishlarda islohotlar amalga oshirildi, davlat qurilishi sohasida katta muvaffaqiyatlarga erishildi. Xitoy bundan chin yurakdan mamnun. Koronavirus infeksiyasi tarqalganidan soʻng Oʻzbekiston ushbu epidemiyaga qarshi kurashishda jipslashdi. Oʻzbekiston xalqi bunda albatta gʻalaba qozonishiga qatʼiy ishonaman.

Joriy yilning may oyida telefon orqali doʻstona ruhda muloqot qildik, koronavirusga qarshi umumiy kurashimiz va ikki tomonlama hamkorlikni mustahkamlash boʻyicha muhim kelishuvlarga erishdik.

Xitoy-Oʻzbekiston munosabatlarini rivojlantirishga katta eʼtibor qaratmoqdaman hamda oʻrtamizdagi namunali ishchan munosabatlarimiz va shaxsiy doʻstlikni yuksak qadrlayman.

Siz bilan birgalikda Xitoy-Oʻzbekiston har tomonlama strategik sheriklik munosabatlarini mamlakatlarimiz va xalqlarimiz farovonligi yoʻlida rivojlantirishda yangi natijalarga erishish uchun harakat qilishga tayyorman.

Doʻst Oʻzbekistonga ravnaq va kuch-qudrat, uning xalqiga esa baxt-saodat va farovonlik tilayman.

Si Szinpin

Xitoy Xalq Respublikasi Raisi

******

Oʻzbekiston Respublikasi Prezidenti

Shavkat Mirziyoyev Janobi Oliylariga

Muhtaram Prezident Janoblari!

Amerika xalqi nomidan Ciz va Oʻzbekiston xalqini mamlakatingiz mustaqilligining 29 yilligi bilan tabriklayman. Amerika Qoʻshma Shtatlari davlatingiz suvereniteti, mustaqilligi va hududiy yaxlitligini qoʻllab-quvvatlashda sizga yelkadoshdir.

Oʻtgan yil ichida, hatto global xatarlarga qaramay, yana-da chuqurlashgan keng miqyosli hamkorligimizni yuqori baholayman. Markaziy Osiyo mamlakatlari oʻrtasidagi aloqalarni mustahkamlash hamda Afgʻoniston bilan hamkorlik va rishtalarni yaxshilash boʻyicha tashabbusingizni olqishlayman. Shuningdek, men katta maqsadlarni koʻzlovchi islohotlar dasturingizni yuqori qadrlayman, u toʻliq amalga oshgach, Oʻzbekiston xalqi va umuman mintaqaning yana-da ochiq va farovon kelajagini taʼminlaydi.

Amerika Qoʻshma Shtatlari ushbu tashabbuslarda va COVID-19 ga qarshi kurashda sherigingiz ekanidan faxrlanadi. Kelgusi yilda hamkorligimizning yana-da samarali natijalariga umid qilib qolaman.

Hurmat bilan,

Donald Tramp

Amerika Qoʻshma Shtatlari Prezidenti

******

Oʻzbekiston Respublikasi Prezidenti

Shavkat Mirziyoyev Janobi Oliylariga

Muhtaram Shavkat Miromonovich!

Oʻzbekiston Respublikasining milliy bayrami - Mustaqillik kuni munosabati bilan samimiy tabriklarimni qabul qilgaysiz.

Tarixan qisqa davrda mamlakatingiz katta yutuqlarga erishdi - u nafaqat Markaziy Osiyoda, balki xalqaro maydonda ham faol ishtirokchiga aylandi.

Qardosh Oʻzbekistonga farovonlik va jadal taraqqiyot, oʻzbek xalqi Siz rahbarligingizda porloq kelajakka erishishini chin yurakdan tilayman.

Sizning mintaqamiz davlatlari oʻrtasida sheriklik va hamkorlikni, shu jumladan Markaziy Osiyo davlatlari rahbarlarining maslahat uchrashuvlari doirasida mustahkamlashdagi saʼy-harakatlaringizni alohida taʼkidlamoqchiman.

Men mamlakatlarimiz oʻrtasidagi koʻp asrlik anʼanaviy hamkorlik asosida shakllangan strategik sheriklik bundan buyon ham rivojlanib borishiga ishonaman.

Fursatdan foydalanib, muhtaram Shavkat Miromonovich, Sizga mustahkam sogʻlik va ulkan muvaffaqiyatlar, qardosh Oʻzbekiston xalqiga esa tinchlik va farovonlik tilaymiz.

Samimiyat ila,

Nursulton Nazarboyev

Qozogʻiston Respublikasining Birinchi Prezidenti Elboshi

******

Oʻzbekiston Respublikasi Prezidenti

Shavkat Mirziyoyev Janobi Oliylariga

Muhtaram Shavkat Miromonovich!

Oʻzbekiston Respublikasining Mustaqillik bayrami munosabati bilan samimiy tabriklarimni qabul qilgaysiz.

Sizning kuchli va ehtiromga sazovor rahbarligingizda Oʻzbekiston barqaror rivojlanishni taʼminlashga, xalqaro maydondagi mavqeini mustahkamlashga xizmat qilayotgan keng miqyosli, uzoq istiqbolga moʻljallangan islohotlarni ishonch bilan amalga oshirmoqda.

Qozogʻiston Oʻzbekiston erishgan yutuqlardan chin dildan xursand hamda mamlakatlarimiz oʻrtasidagi birodarlik rishtalari va har tomonlama hamkorlikni yana-da mustahkamlashga katta ahamiyat beradi.

Ishonchim komil, ikki davlat oʻrtasidagi oʻzaro munosabatlarning barcha masalalari boʻyicha oʻzaro ishonchga asoslangan faol muloqotimiz bundan buyon ham Qozogʻiston-Oʻzbekiston doʻstlik, yaxshi qoʻshnichilik va strategik sheriklik munosabatlarini izchil rivojlantirish uchun mustahkam asos boʻlib xizmat qiladi.

Sizga, muhtaram Shavkat Miromonovich, davlat rahbari sifatidagi faoliyatingizda yangi muvaffaqiyatlar, qardosh Oʻzbekiston xalqiga esa farovonlik va ravnaq tilayman!

Hurmat bilan,

Qasim-Jomart Toqayev

Qozogʻiston Respublikasi Prezidenti

******

Oʻzbekiston Respublikasi Prezidenti

Shavkat Mirziyoyev Janobi Oliylariga

Hurmatli Shavkat Miromonovich!

Qadrli birodarim!

Turkmaniston xalqi va Hukumati nomidan va shaxsan oʻz nomimdan Sizni va Siz orqali butun Oʻzbekiston Respublikasi xalqini mamlakatingiz Mustaqillik kuni munosabati bilan samimiy qutlash va eng yaxshi tilaklarimni izhor etish sharafiga muyassarman.

Mustaqillik yillarida qardosh Oʻzbekiston oʻz davlatchiligini mustahkamlash, xalq farovonligini yaxshilash va xalqaro maydondagi nufuzini oshirishda sezilarli yutuqlarga erishdi.

Mamlakatingizning barqaror ijtimoiy-iqtisodiy rivojlanishi tanlangan yoʻl naqadar samaradorli ekanining yaqqol tasdigʻidir.

Shuni alohida taʼkidlashni istardimki, Turkmaniston Oʻzbekiston Respublikasi bilan yildan yilga yangi mazmun bilan boyib borayotgan munosabatlarni samimiy qadrlaydi. Muloqotimizga xos boʻlgan iliqlik va oʻzaro ishonch bundan buyon ham ikki qardosh xalq manfaati yoʻlida strategik sheriklikni mustahkamlash va rivojlantirishga xizmat qilishiga ishonaman.

Ushbu yoqimli fursatdan foydalanib, Sizga, muhtaram Shavkat Miromonovich, sihat-salomatlik va baxt-saodat, Oʻzbekiston xalqiga esa tinchlik, farovonlik va ravnaq tilayman.

Chuqur hurmat bilan,

Gurbanguli Berdimuhamedov

Turkmaniston Prezidenti

******

Oʻzbekiston Respublikasi Prezidenti

Shavkat Mirziyoyev Janobi Oliylariga

Hurmatli Shavkat Miromonovich,

Sizni va barcha yurtdoshlaringizni milliy bayram - Mustaqillik kuni bilan chin yurakdan qutlayman.

Shunday muhim kunda Sizga mustahkam sogʻlik, baxt-saodat, ishlaringizda yangi zafarlar, qardosh oʻzbek xalqiga esa abadiy tinchlik, farovonlik va ravnaq tilayman.

Mustaqillik yillarida Oʻzbekiston davlatchilikni barpo etishning katta yoʻlini bosib oʻtdi va ijtimoiy-iqtisodiy taraqqiyotda, xalq farovonligi oʻsishini taʼminlashda va oʻzining xalqaro obroʻsini oshirishda salmoqli yutuqlarga erishdi. Ayniqsa, Sizning, muhtaram Shavkat Miromonovich, rahbarligingizda bugun mamlakatning ichki va tashqi siyosatida amalga oshirilayotgan oʻzgarishlar tahsinga sazovor.

Tojikiston-Oʻzbekiston doʻstlik va koʻp qirrali hamkorlik munosabatlarini izchil mustahkamlash va kengaytirish har doim Tojikiston tashqi siyosatining eng muhim yoʻnalishi boʻlgan va shunday boʻlib qolmoqda.

Keyingi yillarda tomonlarning birgalikdagi saʼy-harakatlari bilan Tojikiston va Oʻzbekiston oʻrtasidagi samarali davlatlararo hamkorlik umumiy manfaatlarning barcha sohalarida izchil rivojlanib borayotganini taʼkidlashdan mamnunman.

Ishonchim komil, koʻp asrlik doʻstlik, yaxshi qoʻshnichilik, oʻzaro hurmat va ishonch anʼanalariga asoslanib, biz qardosh xalqlarimiz manfaatlari, mintaqamizda tinchlik, barqarorlik va konstruktiv hamkorlikni yana-da rivojlantirish yoʻlida ikki mamlakat oʻrtasidagi strategik sheriklik munosabatlarini har tomonlama mustahkamlashda davom etamiz.

Chuqur hurmat bilan,

Emomali Rahmon

Tojikiston Respublikasi Prezidenti

******

Oʻzbekiston Respublikasi Prezidenti

Shavkat Mirziyoyev Janobi Oliylariga

Hurmatli Shavkat Miromonovich!

Qirgʻiz Respublikasi xalqi nomidan va shaxsan oʻz nomimdan Sizni va butun Oʻzbekiston Respublikasi xalqini Mustaqillik kuni bilan samimiy muborakbod etaman.

Sizning rahbarligingizda Oʻzbekistonning mintaqada va butun dunyodagi mavqei sezilarli darajada mustahkamlanganini, mamlakatda amalga oshirilgan keng koʻlamli islohotlar ijobiy natijalar berayotganini taʼkidlamoqchiman.

Ishonchim komilki, sizning koʻmagingiz bilan oʻzaro manfaatli hamkorlik va strategik sheriklik tamoyillariga asoslangan doʻstlik va yaxshi qoʻshnichilik munosabatlari bundan buyon ham ikki xalqning yorqin kelajagi yoʻlida izchil rivojlanib boradi.

Hurmatli Shavkat Miromonovich, Sizga va oilangizga sihat-salomatlik, baxt-saodat, ishlaringizda muvaffaqiyatlar, qardosh Oʻzbekiston xalqiga esa tinchlik-osoyishtalik va ravnaq tilayman!

Hurmat bilan,

Sooronbay Jeenbekov

Qirgʻiz Respublikasi Prezidenti

******

Oʻzbekiston Respublikasi Prezidenti

Shavkat Mirziyoyev Janobi Oliylariga

Muhtaram Prezident, hurmatli qardoshim!

Oʻzbekiston Respublikasining Mustaqillik bayrami munosabati bilan Siz Janobi Oliylarini va Siz orqali butun oʻzbek xalqini xalqim va shaxsan oʻz nomimdan eng samimiy tuygʻularim ila muborakbod etaman.

29 yilligini qutlayotgan doʻst va qardosh oʻlka – Oʻzbekiston Respublikasining mustaqilligi biz uchun buyuk quvonch va baxtiyorlik manbaidir.

Turkiya Respublikasi Oʻzbekistonning va oʻzbek qardoshlarining yonida boʻlishda davom etadi.

Bu yil fevral oyida Strategik hamkorlik Oliy kengashi birinchi yigʻilishi va Prezident Devoni qoshidagi kutubxonaning ochilish marosimiga ishtirok etish uchun yurtimizga amalga oshirgan tashrifingizning goʻzal taassurotlari hamon yodimizda.

Strategik sheriklik darajasiga yetgan munosabatlarimizda kuzatilayotgan oʻzgarishlarni eʼtiborga olganda, erishilgan jadallik surʼatlari saqlanishi va davom ettirilishi katta ahamiyatga ega.

Bu borada Qurbon hayiti munosabati bilan yuborgan tabrik maktubingizda Strategik hamkorlik Oliy kengashining keyingi yigʻilishini oʻtkazish uchun Oʻzbekistonga taklifingizni mamnuniyat bilan oldim. Kelgusida diplomatik kanallar orqali belgilanadigan maqbul sanada Oʻzbekistonga tashrif buyurishdan gʻoyat baxtiyor boʻlaman.

Fursatdan foydalanib Siz Janobi Oliylariga sihat-salomatlik, baxt-saodat, doʻst va qardosh oʻzbek xalqiga omonlik tilaklarimni yoʻllayman.

Rejep Tayyip Erdogʻan

Turkiya Respublikasi Prezidenti

******

Oʻzbekiston Respublikasi Prezidenti

Shavkat Mirziyoyev Janobi Oliylariga

Muhtaram Shavkat Miromonovich,

Sizga va butun Oʻzbekiston xalqiga Oʻzbekiston Respublikasi mustaqilligining 29 yillik bayrami munosabati bilan eng samimiy tabriklarimni izhor etishga ijozat bergaysiz.

Oʻtgan yili Oʻzbekistonga tashrifim davomida alohida strategik sheriklik darajasiga koʻtarilgan mamlakatlarimiz oʻrtasidagi munosabatlar yana-da faol rivojlanib borishiga umid qilaman.

Ayni paytda butun dunyo COVID-19 pandemiyasi bilan bogʻliq murakkab davrni boshidan kechirmoqda. Umid qilamanki, mamlakatlarimiz yaqin hamkorlik orqali koronavirusni aql-zakovat bilan yengib, ikki tomonlama aloqalarni yangi, yuqori darajaga koʻtaradi.

Hurmatli Shavkat Miromonovich, Sizga mustahkam sogʻlik va muvaffaqiyatlar, shuningdek, Oʻzbekiston Respublikasiga cheksiz farovonlik tilayman.

Hurmat bilan,

Mun Chje In

Koreya Respublikasi Prezidenti

******

Oʻzbekiston Respublikasi Prezidenti

Shavkat Mirziyoyev Janobi Oliylariga

Prezident Janoblari!

Sizga va mamlakatingiz fuqarolariga Oʻzbekiston Respublikasining Mustaqillik kuni munosabati bilan samimiy tabriklarimni yoʻllayman.

Oʻtgan yilgi oʻzaro tashriflarimizdan buyon Oʻzbekiston va Germaniya oʻrtasidagi munosabatlar mustahkamlanib borayotgani juda quvonarlidir.

Barchamiz uchun jiddiy muammoga aylangan COVID-19 pandemiyasi inqiroz sharoitida ishonch va sheriklik naqadar muhimligini namoyish etmoqda.

Ayni shu paytda Siz boshlagan islohotlar va modernizatsiya jarayonlari koʻrinarli natijalarni bermoqda. Sizga ushbu yoʻlni muvaffaqiyatli davom ettirishingizni tilayman va Germaniya bu borada Oʻzbekistonni qoʻllab-quvvatlashda davom etishga tayyorligini bildiraman.

Sizga eng ezgu tilaklar, Oʻzbekiston xalqiga esa erkinlik, xavfsizlik va farovonlik sharoitida tinch kelajakni tilayman.

Frank-Valter Shtaynmayer

Germaniya Federativ Respublikasi Prezidenti

******

Shuningdek, quyidagilar oʻz tabriklarini yoʻllagan:

NARUXITO - Yaponiya Imperatori

Ram Nath KOVIND - Hindiston Prezidenti

Ashraf GʻANI - Afgʻoniston Prezidenti

Ilhom ALIYEV - Ozarbayjon Prezidenti

Aleksandr LUKASHENKO - Belarus Prezidenti

Igor DODON - Moldova Prezidenti

Vladimir ZELENSKIY - Ukraina Prezidenti

YELIZAVETA II - Buyuk Britaniya va Shimoliy Irlandiya Qirolichasi

FILIPP - Belgiyaliklar Qiroli

FELIPE VI - Ispaniya Qiroli

VILLEM-ALEKSANDR - Niderlandiya Qiroli

KARL XVI GUSTAV - Shvetsiya Qiroli

Aleksandr Van der BELLEN - Avstriya Prezidenti

Rumen RADEV - Bolgariya Prezidenti

Yanosh ADER - Vengriya Prezidenti

Serjo MATTARELLA - Italiya Prezidenti

Egils LEVITS - Latviya Prezidenti

Andjey DUDA - Polshi Prezidenti

Zuzana CHAPUTOVA - Slovakiya Prezidenti

Milosh ZEMAN - Chexiya Prezidenti

Simonetta SOMMARUGA - Shveysariya Prezidenti

FRANSISK - Rim-katolik cherkovi rahbari

Xalifa bin Zoid OL NAHAYON - BAA Prezidenti

Abdulfattoh AS-SISI - Misr Prezidenti

Hasan RUHONIY - Eron Prezidenti

Imron XON - Pokiston Bosh vaziri

Haysam bin TORIQ - Oʻmon Sultoni

Joko VIDODO - Indoneziya Prezidenti

Sulton Abdulloh Riʼyatuddin Al-Mustafo BILLOH - Malayziya Podshohi

Halima YAQUB - Singapur Prezidenti

Rodrigo DUTERTE - Filippin Prezidenti

Mahmud ABBOS - Falastin Prezidenti

Abdul HAMID - Bangladesh Prezidenti

Shayxa HASINA - Bangladesh Bosh vaziri

Abdulmajid TABBUN - Jazoir Prezidenti

Bunnyang VORACHIT - Laos Prezidenti

Xose Daniel ORTEGA SAAVEDRA - Nikaragua Prezidenti

Muhammad bin Zoid OL NAHAYON - BAA Qurolli kuchlari Oliy bosh qoʻmondoni oʻrinbosari, Abu-Dabi Amirligi valiahdi

Muhammad bin Roshid OL MAKTUM - BAA Vitse-prezidenti, Bosh vaziri, Dubay amirligi hokimi

Syuy DUNYUY - Oziq-ovqat va qishloq xoʻjaligi tashkiloti (FAO) bosh direktori

Zurab POLOLIKASHVILI - Jahon sayyohlik tashkiloti bosh kotibi

Kunio MIKURIYA - Jahon bojxona tashkiloti bosh kotibi

Salim AL-MALIK - Taʼlim, fan va madaniyat masalalari boʻyicha Islom tashkiloti (AYSESKO) bosh direktori

Jilber UNGBO - Qishloq xoʻjaligini rivojlantirish xalqaro jamgʻarmasi prezidenti

Bagʻdat AMREYEV - Turkiy tilli davlatlar hamkorlik kengashi Bosh kotibi

Sergey LEBEDEV - Mustaqil Davlatlar Hamdoʻstligi Ijroiya qoʻmitasi raisi – Ijrochi kotibi

Xorijiy davlatlar va hukumatlar, xalqaro tashkilotlar rahbarlari, taniqli siyosatchilar va jamoat arboblarining qutlovlari kelishi davom etmoqda.


27 693
OʻzA