Kollejni bitiruvchi qizlarga zamonaviy tikuv dastgohlari topshirildi
Nurota qishloq xo‘jaligi kasb-hunar kollejini bitiruvchi qizlarning 45 nafariga “Savdogarbank” viloyat filiali tomonidan zamonaviy tikuv dastgohlari topshirildi.
Nurota qishloq xo‘jaligi kasb-hunar kollejini bitiruvchi qizlarning 45 nafariga “Savdogarbank” viloyat filiali tomonidan zamonaviy tikuv dastgohlari topshirildi.Mamlakatimizda kasb-hunar kollejlari bitiruvchilari bandligini ta’minlash, ularni tadbirkorlik faoliyatiga keng jalb etishga alohida e’tibor qaratilmoqda. Prezidentimizning joriy yil 14-martdagi “O‘rta maxsus, kasb-hunar ta’limi muassasalari faoliyatini yanada takomillashtirish chora-tadbirlari to‘g‘risida”gi qarori bu borada muhim dasturilamal bo‘layotir.
Navoiy viloyatida ham bitiruvchi yoshlar bandligini ta’minlash borasida tizimli ishlar amalga oshirilmoqda. O‘tgan yili viloyatda 12 ming 953 nafar yosh mutaxassis kasb-hunar kollejini bitirdi. Tadbirkorlik faoliyatini yo‘lga qo‘yish istagini bildirgan 1 ming 362 yosh mutaxassisga qariyb 15 milliard so‘m miqdorida imtiyozli kredit ajratildi.
– Kasb-hunar kollejini bitirayotgan yoshlarga tijorat banklari tomonidan imtiyozli kreditlar ajratilayotgani yangi ish o‘rinlari yaratilishida muhim omil bo‘lmoqda, – deydi Navoiy viloyati o‘rta maxsus, kasb-hunar ta’limi boshqarmasi bo‘lim boshlig‘i O.Bobomurodov. – Yosh tadbirkorlar turli yo‘nalishlarda o‘z biznesini yo‘lga qo‘yib, oilasi farovonligiga hissa qo‘shmoqda, tengdoshlarini ish bilan ta’minlamoqda.
Nurota qishloq xo‘jaligi kasb-hunar kollejida 970 dan ortiq o‘quvchi zamonaviy sharoitlarda tahsil olmoqda. Joriy o‘quv yilida ta’lim maskanini 300 dan ziyod yosh mutaxassis bitiradi.
– Tijorat banki tomonidan tikuv dastgohi berilganidan juda xursandmiz, – deydi kollej bitiruvchisi Feruza Alimova. – Mustaqil ravishda tikuvchilik bilan shug‘ullanib, tayyor trikotaj mahsulotlari tayyorlashni rejalashtirganman. Eng muhimi, imtiyozli kredit shartlari biz, yoshlarga ma’qul bo‘lmoqda.
Joriy yilda viloyatdagi kasb-hunar kollejlari bitiruvchilarining tadbirkorlik faoliyati va biznes loyihalarini moliyaviy qo‘llab-quvvatlash maqsadida tijorat banklari tomonidan 24 milliard 500 million so‘mga yaqin imtiyozli kredit mablag‘i ajratilishi belgilangan.