O‘zbekiston pillakorlari 26,2 ming tonnadan ziyod pilla tayyorlab, yillik shartnoma majburiyatini bajardi

O‘zbekiston pillakorlari 26,2 ming tonnadan ziyod pilla tayyorlab, yillik shartnoma majburiyatini bajardi

Pillakorlarimizning azmu shijoati va fidokorona mehnati natijasida uyilgan bu xirmon Vatanimiz mustaqilligining 25-yillik bayramiga munosib tuhfa bo‘ldi.

Prezidentimiz Islom Karimov rahnamoligida qishloq xo‘jaligida amalga oshirilayotgan keng ko‘lamli islohotlar samarasida pillachilikda ham yuksak samaralarga erishilmoqda. Davlatimiz rahbarining 2006-yil 15-noyabrdagi “Respublika pillachilik tarmog‘ini yanada isloh qilish chora-tadbirlari to‘g‘risida”gi qarori bunda muhim dasturilamal bo‘layotir.

O‘zbekiston Qishloq va suv xo‘jaligi vazirligidan ma’lum qilishlaricha, joriy yilda pillakorlarimiz “Ipakchi-1”, “Ipakchi-2”, “O‘zbekiston-5”, “O‘zbekiston-6” kabi serhosil, iqlim sharoitimizga mos, kasalliklarga chidamli mahalliy navlardan ipak qurti parvarishlab, har qutidan o‘rtacha 58,2 kilogrammdan hosil oldi.

Samarqand, Surxondaryo, Buxoro, Navoiy, Sirdaryo, Qashqadaryo, Farg‘ona viloyatlari pillakorlari birinchilar qatorida shartnoma rejasini bajardi. Jondor, Narpay, Beshariq, Boyovut, Jarqo‘rg‘on, Kasbi, Qiziltepa, Chust, Qo‘rg‘ontepa tumanlarida har quti ipak qurtidan 60-68 kilogrammdan hosil olishga erishildi.

Uychi tumanidagi «Usmonjon domla» fermer xo‘jaligida har quti urug‘dan 78, Jondor tumanidagi “Zolinlik marjon Maqsud” fermer xo‘jaligida 75, Yuqori Chirchiq tumanidagi «Hamidjon Mirzaodil» fermer xo‘jaligida 72, Do‘stlik tumanidagi “Eshbek ota” fermer xo‘jaligida 70, Jalaquduq tumanidagi «Vafo malikasi» fermer xo‘jaligida 69, To‘rtko‘l tumanidagi “Quvondiq Ixtiyor” fermer xo‘jaligida 66 kilogrammgacha sifatli «kumush tola» olindi.

Pillakorlarimizning bu ulkan muvaffaqiyatida davlatimiz rahbari tomonidan yangi navlar yaratish hamda ipak tolasining sifatini xalqaro standartlar darajasiga ko‘tarish, uni qayta ishlash jarayonini isloh qilish ustuvor vazifa etib belgilangani muhim ahamiyat kasb etdi.

Shu bilan birga, fermerlarni moddiy rag‘batlantirishga alohida e’tibor qaratilgani samaradorlikning muhim omili bo‘ldi. Xususan, pillaning xarid narxi o‘rtacha 11 foiz oshirilib, hosil qiymatining 43 foizi miqdoridagi mablag‘ mavsum boshidanoq bo‘nak sifatida berildi.

– Hosilni yetishtirishda fermerlarga joylardagi hokimiyat vakillari, mahalla fuqarolar yig‘inlari yaqindan yordam berdi, – deydi Qishloq va suv xo‘jaligi vazirligining pillachilikni rivojlantirish boshqarmasi boshlig‘i Qahhor Yovqochdiyev. – E’tiborlisi, fermerlar pillani qayta ishlovchi yirik korxonalar bilan to‘g‘ridan-to‘g‘ri shartnoma tuzdi. Unga ko‘ra, korxona mavsum davomida kerak bo‘ladigan barcha jihozlarni yetkazib berdi. Natijada yuqori sifatli xomashyo yetishtirildi. Zero, milliy boyliklarimizdan biri bo‘lgan pilla sanoatimizni izchil rivojlantirishda alohida o‘rin tutadi. Bir tonna pilladan 350 kilogramm ipak, 20 ming metr adras, 13 ming metr atlas va boshqa mahsulotlar olish mumkinligini e’tiborga olsak, pillakorlarimiz erishgan yutuqdan ko‘nglimiz faxr va g‘ururga to‘ladi.

Tarmoqni rivojlantirishga qaratilayotgan e’tibor samarasida Surxondaryo viloyati pillakorlari birinchilardan bo‘lib “kumush tola” oldi. Viloyatda hosildorlikni oshirish va mahsulot sifatini yaxshilash maqsadida tumanlardagi pilla qabul qilish korxonalari mavsumga puxta tayyorlandi.

– Pillakorlarimiz 1 ming 553 tonna pilla yetishtirishga bel bog‘lagandi, – deydi viloyatdagi «Intersilk pro» pillani qayta ishlash korxonasi rahbari Olimjon Jumayev. – Hosilning asosiy qismi Jarqo‘rg‘on, Qumqo‘rg‘on, Termiz tumanlari hissasiga to‘g‘ri kelayotir. Korxonamizda xomashyodan sifatli ipak tayyorlab, eksportni yo‘lga qo‘ydik. Ipakdan atlas ishlab chiqarishni mo‘ljallayotirmiz.

Keyingi yillarda mavjud tutzorlar maydonining kengayishi, ozuqa bazasi mustahkamlangani, mavsumga malakali mutaxassislar jalb etilib, pillakorlar uchun zarur moddiy-texnik resurslar o‘z vaqtida to‘liq yetkazib berilgani sohadagi yutuqlarda katta ahamiyat kasb etmoqda.

Pilla qabul qilish punktlarida ish qizg‘in davom etmoqda. Keyingi yilgi mavsumga tayyorgarlik ko‘rish, tutzorlarga ishlov berish, ularni zararkunandalardan asrash kabi ishlar olib borilmoqda.