O‘zA O`zbek

22.03.2018 15:00:19 Chop etish versiyasi

“Navoiy” KMK ning Surxondaryodagi ikkinchi zamonaviy loyihasi

Yangi parrandachilik majmuasi ishga tushdi

Surxondaryo viloyati Termiz tumanidagi Qo‘ng‘irot mahallasida zamonaviy parrandachilik majmuasi foydalanishga topshirildi.

Navoiy kon-metallurgiya kombinati tomonidan barpo etilgan majmuaning ochilish marosimida davlat va jamoat tashkilotlari vakillari, mahalla oqsoqollari va yoshlar ishtirok etdi.

3.jpg

Bir yilda 10 million dona tuxum va 120 tonna parxezbop parranda go‘shti ishlab chiqarish quvvatiga ega majmuada 66 kishi ish bilan ta’minlandi. Ularning aksariyati yoshlardir. Majmua to‘la quvvat bilan ishga tushgach, 105 kishi doimiy ish o‘rniga ega bo‘ladi.

Zamonaviy xorij uskunalari bilan jihozlangan majmuada bir yo‘la 36 ming jo‘ja va 30 ming tovuq parvarishlanadi.

7.jpg

Faol tadbirkorlik, innovatsion g‘oyalar va texnologiyalarni qo‘llab-quvvatlash yilida foydalanishga topshirilgan korxonani chiqitsiz texnologiya asosida ishlatish mo‘ljallanayotir. Shu maqsadda biogaz ishlab chiqarish uskunalari o‘rnatildi. Bu yerda parranda go‘ngidan olingan biogazdan majmuaning o‘zida foydalaniladi. Undan ajralib chiqqan chiqindi tabiiy o‘g‘it sifatida ishlatiladi. Tovuq paridan yumshoq yostiq tayyorlash yo‘lga qo‘yiladi.

11.jpg

Mazkur parrandachilik majmuasi Navoiy kon-metallurgiya kombinati tomonidan Surxondaryo viloyatida barpo etilgan ikkinchi zamonaviy loyihadir. O‘tgan yili kombinat foydalanishga topshirgan Termiz mexanika zavodida qishloq xo‘jaligi mahsulotlarini qayta ishlash korxonalari uchun asbob-uskuna va ehtiyot qismlar ishlab chiqarish yo‘lga qo‘yilgan. Uning ikkinchi bosqichini bunyod etishda qurilish-montaj ishlari qizg‘in davom etmoqda.