Урганч шаҳрида "Биз табиат ҳимоячиларимиз" шиори остида"Экозаковат" интеллектуал ўйини бўлиб ўтди.

Мусобақада Хоразм вилоятидаги олий таълим муассасаларининг заковатли талабалари экологик билим ва тушунчаларини синовдан ўтказишди. 

Ўзбекистон Экологик партияси Хоразм вилоят кенгаши ташаббуси билан "Заковат интеллектуал клуби" ННТ ҳамкорлигида “Биз табиат ҳимоячиларимиз” шиори остида ўтказилган интеллектуал ўйинда иштирокчиларга табиатни асраш, экологик хавфсизликни таъминлаш, яшил иқтисодиёт тамойилларини жорий этиш борасида саволлар берилди.

– Тадбир нафақат билимларни мустаҳкамлаш, балки ёш авлод қалбида Ватанга, табиатга, экологик қадриятларга нисбатан ҳурмат ва масъулият ҳиссини кучайтиришга хизмат қилди, – дейди "Заковат интеллектуал клуби" нодавлат нотижорат ташкилоти координатори Азамат Маткаримов. – Қувонарлиси, иштирок этган талабаларнинг экология билан боғлиқ саволларга зукколик билан жавоб беришгани. Улар деярли барча саволларга тўғри жавоб беришди. Бу уларнинг таълим олишлари баробарида она табиатимизга ҳам бефарқ эмасликларини англатади. 

Ёшларнинг экологик тафаккурини кенгайтириш, улар ўртасида соғлом рақобат муҳитини шакллантириш ҳамда экологик қадриятларни чуқур англашлари учун замин яратадиган ўйин натижаларига кўра, Абу Райҳон Беруний номидаги Урганч давлат университетининг “Жайхун” жамоаси учинчи, Урганч тиббиёт институтининг “Жайхун” жамоаси иккинчи ва Урганч давлат педагогика институтининг “Фенекс” жамоаси биринчи ўринни эгаллади. 

Тадбир сўнггида ғолиб ва фаол жамоалар ташкилотчилар томонидан ташаккурнома ҳамда эсдалик совғалари билан тақдирланди. 

Бу каби интеллектуал мусобақалар ёшларни экологик муаммоларга эътиборли бўлишга ундаб, уларнинг тафаккурини ҳамда жамиятда ижтимоий фаоллигини оширади.

<iframe width="650" height="420" src="https://www.youtube.com/embed/0vLuItv8X2k" title="Ekozakovat”chilar tabiat himoyachilari" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Аҳмаджон Шокиров, Беҳзод Саидов (сурат, видео), ЎзА мухбирлари