Франция Президенти Эммануэль Макрон Германиянинг (FAZ) нашрига берган интервьюсида Россияни терроризм каби Европа учун “энг йирик тузилмавий таҳдид” деб атади ва РФга қарши санкция сиёсатини давом эттиришга алоҳида эътибор қаратиш зарурлигини таъкидлади.
Унинг айтишича, Европа Россиядан келаётган хавфни етарли даражада баҳоламаяпти. Яъни, Москва томонидан сайловга аралашув, киберҳужум, мухолифларни йўқ қилиш, миграция оқимидан сиёсий босим воситаси сифатида фойдаланиш сингари ҳаракатлар қитъа хавфсизлигига таҳдид солмоқда.
– Россия ҳаво мудофаамизни синовдан ўтказиб, ўз ядровий доктринасини ўзгартирди, – деди Макрон. – Руслар ёлғон маълумот тарқатиш орқали жамоатчилик фикрига таъсир ўтказмоқда.
Франция етакчиси Европа жамиятларининг очиқлиги ахборот хуружи олдида ҳимоясизлигини таъкидлаб, шундай деди:
– Россиянинг махфий армияси демократик тузумимизга сингиб бораётганини кўрмаслик –бизнинг ожизлигимиз. Рус ҳарбийлари номаълум кибер шахслардир. Улар Франция, Германия ва Европа бўйлаб демократияни бўғмоқда.
“Европа ҳаво ҳудудига рухсатсиз кирган РФ ҳарбий самолётини уриб тушириш керакми?” деган саволга эса Макрон “Стратегик ноаниқлик доктринаси доирасида шуни айта оламанки, ҳеч нима истисно қилинмайди” мазмунида жавоб берган. Шу билан бирга Ғарб давлатлари раҳбарларининг Россияга қарши ҳаракатини танқид қилиб, Украина иттифоқчилари ҳали қилинмаган ишларини олдиндан эълон қилишни тўхтатиши кераклигини таъкидлади ва “Бу заифлик белгиси, қилинажак ишлар ҳақида Путинга маълумот етказмаслигимиз керак”, – деди.
Франция Президенти фикрича, Россияга қарши санкция кутилганидан яхшироқ ишламоқда. Фақат бу амалиёт янада самарали кечиши учун РФнинг санкциядан қочиб ишлаётган тахминан 800 кемадан иборат флоти фаолиятини назоратга олиш лозим.
Макрон ЕИда музлатилган Россия активини Украина фойдасига ишлатиш бўйича Германия канцлери Фридрих Мерцнинг позициясига қуйидагича муносабат билдирди:
– Маблағ шунчаки мусодара қилиниши мумкин эмас, чунки бу халқаро ҳуқуқ меъёрига зид. Бу пул фақат Украинага узоқ муддатли ёрдамни кафолатлаш воситаси бўлиб хизмат қилиши мумкин. Яъни, Германия томонидан Украина манфаати бўйича умумий қарз мажбуриятини ўз зиммасига олишни англатади ва немис-француз ҳамкорлигининг амалий натижаси сифатида намоён бўлади.
<iframe width="640" height="420" src="https://www.youtube.com/embed/ynYNp9yX6E0" title="Makron: Rossiya tahdidini yetarli baholamadik" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Улуғбек Тўхтаев (видео), ЎзА