Яқиндагина Грециянинг Ираклион шаҳрида ниҳоясига етган оғир атлетика бўйича ёшлар ўртасидаги жаҳон чемпионатида Самарқанд давлат университетининг уч нафар талабаси - Оғабек Тўхтаев, Ҳожиакбар Олимов, Шарофиддин Амриддинов Ўзбекистон шарафини муносиб ҳимоя қилди.

89 кг вазн тоифасида қайд этилган Ҳожиакбар Олимов силтаб кўтариш баҳсида 188 килограмм натижа билан кумуш медални қўлга киритди.

Шахсий вазни 102 килограммгача бўлган спортчилар гуруҳида супачага чиққан Шарофиддин Амриддинов даст кўтаришда олтин медални эгаллаган фаластинлик Ҳамада Муҳаммад билан бир хил натижага эришди. Фақат айни оғирликдаги тошни рақибидан кейин кўтаргани учун дастлабки машқ бўйича кумуш медалга қаноат қилишга тўғри келди. Силтаб кўтаришда эса ҳамюртимиз мураббийлар ишончини тўлиқ оқлади ва 204 кг билан олтин медални нақд қилди. Оғир атлетика қоидаларига мувофиқ, спортчимиз тўплаган умумий 372 килограмм иккикураш натижаси учун яна бир олтин медал жамоамиз ҳисобига ёзилди. Шу тариқа Шарофиддин Амриддинов икки олтин, бир кумуш медалга сазовор бўлди.

Шунингдек, 73 кг. вазн тоифасида иштирок этган Оғабек Тўхтаев совриндорлар учлигига муносиб қаршилик кўрсатиб, 4-ўринни банд этди. Умумий ҳисобда СамДУ талабалари 4 та - 2 олтин, 2 кумуш медални қўлга киритишди. Энди спортчиларимиз 15 май куни Анталия шаҳрида бошланадиган “Ислом бирдамлик ўйинлари”га тайёргарлик кўришади.

Беҳруз ШАМСИДДИНОВ,

СамДУ ахборот хизмати ходими