Олий ва ўрта махсус таълим вазирлигида ёшларни илм-фан соҳасига кенг жалб этиш, улар ташаббусларини қўллаб-қувватлаш, илмий тадқиқот ишларини олиб боришлари учун зарур шарт-шароитлар яратиш мақсадида анъанавий тарзда ўтказиб келинаётган “Янги Ўзбекистоннинг истеъдодли ёшлари” номли илмий-инновацион ишланмалар республика танлови ғолибларини тақдирлаш маросими бўлиб ўтди.

Унда 5 та йўналишда ғолибликни қўлга киритган 15 нафар бўлажак олимлар вазир Абдуқодир Тошқулов ҳамда “Улуғбек” жамғармаси раиси Оқил Салимов томонидан муносиб тақдирланди. 

Сўзга чиққанлар бугун илмий фаолият билан шуғулланаётган иқтидорли ёш тадқиқотчилар учун яратилган имкониятлар ҳақида сўзлаб, бу каби танловлар уларнинг илмий фаолиятларида олға юришлари учун туртки бўлиши, бугунги натижалар билан тўхтаб қолмасликларини қайд этди.  

– Бу каби тадбирларни кўпроқ ташкил қилиб, уларни юртимизнинг ҳар бир чекка ҳудудигача етиб борадиган даражада тарғиб қилишимиз керак, деди вазир А.Тошқулов. – Ана шундагина қишлоқлардан ҳам билимга чанқоқ кўплаб ёшларимизни илмга жалб қилган, ёш олимлар етишиб чиқишига замин яратган бўламиз.  

Маълумот ўрнида таъкидлаш жоизки, жорий йилги танлов техника ва технология, ахборот технологиялари, тиббиёт, қишлоқ ва сув хўжалиги, архитектура ва қурилиш каби бешта йўналишда ўтказилди.  

Танловга 51 та олий таълим муассасаларидан жами 246 та ишланма тақдим этилган. Мазкур танловга тақдим этилган ҳужжатлар ва материаллар экспертлар гуруҳи томонидан кўриб чиқилиб, бир қанча мезонлар асосида баҳоланди. 

Баҳолаш якунига кўра, юқорида келтирилган 5 та йўналишнинг ҳар бири бўйича 1-, 2-, 3-ўринлар учун 15 нафар ғолиб аниқланди. 

Танловда 5 нафар 1-ўринни эгаллаган ғолибларнинг ҳар бири 30 миллион сўмдан, 5 нафар 2-ўринни эгаллаган ғолибларнинг ҳар бири 20 миллион сўмдан, 5 нафар 3-ўринни эгаллаган ғолибларнинг ҳар бири 10 миллион сўмдан пул мукофотлари билан тақдирланди. 

Муҳайё Тошқораева, ЎзА