Пойтахтимиздаги “Дийдор” ёшлар экспериментал театр-студияси 27 март – Халқаро театр куни арафасида ўз мухлисларини “Қалб мусиқаси” номли спектакль намойиши билан мамнун этди.

 “Қалб мусиқаси” спектакли – пантомима йўналишидаги саҳна асари бўлиб, унда инсонийлик, меҳр-оқибат, эзгулик, хайр ва саховат, яхшиликка хайрихоҳлик каби азалий тушунчалар бугунги кун талқинида гавдалантирилган. 

Сўз ўрнини пластик хатти-ҳаракатлар, ишора, турли рақслар эгаллаган ушбу спектаклда жамиятнинг технологик жиҳатдан жадал тараққиёти одамлардаги ўзлик, руҳият, энг тоза ва самимий тушунчаларга рахна солаётганлиги қизиқарли тарзда очиб берилган. 

Томоша асносида инсон фақат ўтмиш ёки хотира гирдобида қолиб  ҳам, умрини техниканинг энг сўнгги ютуқлари бўлмиш смартфону, планшетларга бой бериб ҳам яшамаслик кераклиги ҳақида хулосага келиш мумкин. Сўқир қалб ёки манқуртликдан эса одамларни фақатгина ҳақиқий гўзаллик сақлаб қолиши мумкин. 

Айтиш жоизки, бугунги кунда “Дийдор” театр-студиясида ижодкор ёшларни изланиш сари ундовчи, санъатга бўлган қизиқиши ва эътиборини орттиришга хизмат қилувчи асарларни саҳналаштиришга жиддий аҳамият қаратилмоқда. 

Истеъдодли режиссёр Бобур Йўлдошев бадиий раҳбар бўлган ушбу спектаклни Улуғбек Абдураҳимов ҳамда Афсона Азимова саҳналаштирган. Либослар ва декорация бўйича рассом – Доно Ғаниева. Пантомима спектаклда Улуғбек Абдураҳимов, Ҳусанбой Мамашарипов, Муниса Магаметибрагимова, Элмира Иброҳимова, ва бошқа ёш ижрочилар иштирок этган. Спектакль томошабинларга манзур бўлди. 

Н.Усмонова, ЎзА