Тошкент давлат техника университетида содир бўлган ҳолат юзасидан Олий ва ўрта махсус таълим вазирлиги маълумот берди
Ижтимоий тармоқларда Тошкент давлат техника университетининг бешинчи қаватидан ўзини ташламоқчи бўлган фуқаро ҳақида хабарлар тарқалди.
Олий ва ўрта махсус таълим вазирлиги ахборот хизмати ушбу ҳолат бўйича маълумот берди.
Унга кўра, жорий йилнинг 15 февраль куни соат 11:50 ларда Тошкент давлат техника университетининг реконструкция ишлари якунланаётган А-блокида қурилиш ташкилотининг ёлланма ишчиси бинонинг том қисмига чиқиб, бажарган ишлари эвазига иш хақини олмаганлиги учун масъулларга шарт қўйган.
Ушбу ҳолат бўйича қурилиш ташкилоти раҳбарлари, ИИБ ходимларига зудлик билан хабар берилган. Шундан сўнг фуқаро билан гаплашилиб, унга қурилиш ташкилоти томонидан иш ҳақи тўлаб берилиши таъминланган.
Олий ва ўрта махсус таълим вазирлиги бу фуқаронинг олий таълим муассасасига алоқаси йўқлигини ва университет ходими эмаслигини маълум қилди.
Ф.Яҳёев, ЎзА