Олий Мажлис Қонунчилик палатасида бўлиб ўтган навбатдаги “Ҳукумат соати”да халқ таълим вазирлиги вакилларига соҳага оид саволлар билан мурожаат қилинди.
Қонунчилик палатаси Спикери ўринбосари Алишер Қодиров қуйидаги савол билан мурожаат қилди:
— Умумтаълим мактабларида тарбия фани жорий этилган. Бу фан фарзандларимиз таълим-тарбияси ва эртанги куни учун муҳим ҳисобланади. Шу боис тарбия фанини ўзининг мутахассиси ўтиши керак. Аммо айни пайтда кўп жойларда ушбу фанни тўғри келган ўқитувчи ўтаётгани сир эмас. Бу борада қандай чоралар кўрилмоқда?
Халқ таълими вазири Бахтиёр Саидов: — Вазирлик тизимида 7 та категория бўйича платформа ишлаб чиқилди. Ўқитувчилар ушбу базага киритилади, тоифаси бор-йўқлиги, тил билиш даражаси, ўқувчилар билан муносабати каби йўналишларда синовдан ўтказилиб, диагноз қўйилади. Масалан, 7 категориянинг 4 тасидан ўтолмаса, ўқитувчилар ўша йўналишда ўқитилади. Кейинги марта ҳам белгиланган талаблардан ўтолмаса, бошқа чоралар кўрилади.
Мактабларимизда тарбия фани татбиқ этилди ва бу ўз натижасини беришига ишонамиз. Ҳақиқатан ҳам кўп мактабларда бошқа фан ўқитувчилари тарбия фанини ўтаётган ҳоллар ўрганилди. Бу борадаги камчиликлар бўйича тегишли чоралар кўрилиб, алоҳида маълумот тақдим этамиз.
Муҳтарама Комилова, ЎзА