“Uzbekistan Airports” акциядорлик компанияси йўловчи ва багажни рўйхатдан ўтказишнинг янги – Astra DCS тизимини босқичма-босқич жорий қилмоқда. Қарши халқаро аэропортида ҳам ушбу тизим имкониятларидан фойдаланиш бошланди.

Бугун соат 00:53 да “IrAero” авиакомпаниясининг Қарши-Иркутск йўналиши бўйича парвоз қилган ҳаво кемаси йўловчиларига аэропортда янги тизим асосидада хизмат кўрсатилди.

Astra DCS – йўловчилар ва багажни рўйхатдан ўтказиш жараёнининг барча зарур операцияларини автоматик равишда бажарилишини таъминлайдиган замонавий кўп тилли хостинг тизим ҳисобланади. У нафақат серверлар ва бошқа ихтисослаштирилган ускуналарга техник хизмат кўрсатиш учун қўшимча харажатларни тежайди, балки электрон чипталар ҳолатини интерактив тарзда ўзгартириш имконини ҳам беради. Мутахассисларнинг билдиришича, бу тизим бошқаларидан функцияларининг оддийлиги, шу билан бир қаторда юқори самарадорлиги, ишончлилиги ва фойдаланиш қулайлиги билан ажралиб туради.

– Astra DCSни муваффақиятли синовдан ўтказдик, – дейди аэропортнинг ташишларни ташкил қилиш хизмати бошлиғи Зуҳриддин Усмонов. – Илк амалиёт бўлишига қарамай, янги тизим ёрдамида ҳар бир йўловчи ва унинг юкларини рўйхатдан ўтказиш учун камида бир дақиқани тежаб қолиш имконига эга бўлдик.
 

Ўлмас Баротов,  ЎзА