Президент Шавкат Мирзиёев раислигида аҳолини сифатли уй-жой билан таъминлаш, "Янги Ўзбекистон" массивларини барпо этиш, “Яшил макон” умуммиллий лойиҳасини пухта тайёргарлик кўрган ҳолда бошлаш масаласига бағишланган видеоселектор йиғилиши бўлиб ўтмоқда.

– Бугунги йиғилишда ҳудудларда бўлиб ўтган сайловолди учрашувларда аҳолимиз томонидан кўп кўтарилган иккита муҳим масалани кўриб чиқамиз. Кун тартибидаги биринчи масала, бу – аҳолини сифатли уй-жой билан таъминлаш ҳисобланади. “Инсон қадри учун” тамойили асосида келгуси беш йилдаги барча ислоҳотларимиз аҳолига муносиб турмуш шароити яратишга қаратилган, – деди Шавкат Мирзиёев.

Таъкидланганидек, сўнгги йилларда юртимизда ипотека дастурлари доирасида 140 мингдан ортиқ уй-жойлар барпо этилган. Бу рақамни олдинги йилларга солиштирганда 10 мартадан ҳам кўп демакдир.

Мамлакатимизда ҳар йили 300 мингга яқин никоҳлар қайд этилмоқда, аҳолимиз келгуси беш йилда 38 миллионга етиши кутилмоқда. Мисол учун, сўнгги 30 йилда Наманган, Термиз ва Хонобод шаҳарлари аҳолиси 2, Қарши, Жиззах, Марғилон, Нукус, Андижон, Зарафшон ва Қувасой аҳолиси 1,5 бараварга ўсган.

– Самарқанд ва Наманган шаҳарлари аҳолиси 1 миллиондан ошади, бу ҳам ҳақиқат. Буларни инобатга олиб, аҳолининг уй-жойга бўлган талабини қондириш учун келгуси беш йилда йилига 80 мингтадан хонадон қуришимиз зарур, – деди давлатимиз раҳбари.

ЎзА