Ўзбекистон Республикаси Ипакчилик ва жун саноатини ривожлантириш қўмитаси мутасаддиларидан иборат мамлакатимиз делегацияси Испания Қироллигига ташриф буюрди.
Ташриф режасига асосан, Испания Қироллигининг гўшт, сут, жун ва гранулали озуқа-ем ишлаб чиқаришга ихтисослашган бир қатор корхоналари ҳамда Кастилия Лион ҳудудий ҳокимиятида учрашув ташкиллаштирилди.
Шунингдек, Ўзбекистон делегацияси аъзолари "OVIGEN" ҳамда "WES" компаниялари фаолияти билан яқиндан танишди. Ташриф сўнггида "Яйлов хўжалигини ривожлантириш" уюшмаси, Испания Қироллигининг "OVIGEN" ҳамда "WES" компаниялари ўртасида уч томонлама ҳамкорлик меморандуми имзоланди.
Ипакчилик ва жун саноатини ривожлантириш қўмитаси ахборот хизмати маълумотига кўра, мазкур меморандум давлатимиз раҳбарининг жорий йил 9 февралдаги «Қоракўлчилик тармоғини янада ривожлантириш бўйича қўшимча чора-тадбирлар тўғрисида»ги қарорига асосан, соҳа олдидаги энг муҳим вазифалар ижросини таъминлаш юзасидан имзоланди.
Ҳамкорликнинг кейинги босқичида Ипакчилик ва жун саноатини ривожлантириш қўмитаси томонидан Испания Қироллигининг "OVIGEN" ҳамда "WES" компаниялари экспертларидан иборат делегацияни Ўзбекистонда қабул қилиш режалаштирилган.
Гулноза Бобоева, ЎзА