1937 йили (бундан 84 йил олдин) – Тошкент шаҳрида “Ипакчилик саноати илмий-тадқиқот институти” ташкил қилинди. Айни пайтда мазкур институт низоми ишлаб чиқилиб, вазифалари белгилаб олинди.
Тарихчи Наргизахон Алимованинг қайд этишича, институтнинг асосий вазифаларидан бири ишлаб чиқарилган ипак хомашёсини, ипак маҳсулотлари ва ипакни қайта ишлаш жараёнидаги чиқиндиларни қайтадан ишлатишнинг сермаҳсул усулларини техникавий, иқтисодий, меъёрий ва ташкилий жиҳатдан ўрганишдан иборат бўлган.
1969 йил (бундан 52 йил олдин) – курашчи, халқаро миқёсдаги спорт устаси, “Ўзбекистон ифтихори” фахрий унвони соҳиби Маҳтумқули Маҳмудов таваллуд топди. У 10 ёшидан кураш билан шуғулланган. Ёш спортчи 1992 йилда Тошкент автомобиль-йўллар институти (ҳозирги Тошкент давлат транспорт университети)ни тугатган. Маҳтумқули Маҳмудов Ат-Термизий хотирасига бағишланган халқаро мусобақаларнинг бир неча бор ғолиби. У 73 кг вазнда Ўзбекистон чемпиони, жаҳон чемпионати бронза медали совриндори, жаҳон чемпиони бўлган.
1975 йил (бундан 46 йил олдин) – спортчи, “Ўзбекистон ифтихори” фахрий унвони соҳиби Акобир Қурбонов таваллуд топди. У самбо бўйича 74 ва 82 кг вазн тоифаларида Ўзбекистон, Осиё ва жаҳон чемпиони, жаҳон кубоги ғолиби. Кураш бўйича 73 кг вазн тоифасида Ўзбекистон ва жаҳон чемпиони. Акобир Қурбонов 1996 йилда Ўзбекистон Республикаси Ички ишлар вазирлиги академиясини тугатган.
1999 йил (бундан 22 йил олдин) – Президент фармонига асосан, Американинг “Шеттл-Эндевер” космик кемасида фазони тадқиқ этишдаги жасорати, ўзбек миллатининг шон-шуҳратини юксалтиришдаги хизматлари ҳамда ёшларга коинот сирларини ўргатиш, уларни ватанпарварлик ва дўстлик руҳида тарбиялашга қўшган улкан ҳиссаси учун космонавт Солижон Шарипов “Буюк хизматлари учун” ордени билан мукофотланди.
2002 йил (бундан 19 йил олдин) – Ўзбекистон Республикаси Вазирлар Маҳкамасининг “Маданий мерос объектларини муҳофаза қилиш ва улардан фойдаланишни янада такомиллаштириш чора-тадбирлари тўғрисида”ги қарори қабул қилинди.
2005 йил (бундан 16 йил олдин) – Ўзбекистон Республикаси Вазирлар Маҳкамасининг “Тошкент тиббиёт академияси фаолиятини ташкил этиш тўғрисида”ги қарори қабул қилинди.
2019 йил (бундан 2 йил олдин) – Ўзбекистон Республикасининг “Қурол тўғрисида”ги Қонуни қабул қилинди.
Алишер ЭГАМБЕРДИЕВ тайёрлади.
ЎзА