Афғонистонда толибларнинг “яширин” губернатори йўқ қилинди
Афғонистон ҳарбийлари “Толибон” ҳаракати томонидан тайинланган ноқонуний губернатор Мулла Ҳалимни йўқ қилган.
Бу ҳақда мамлакат мудофаа вазирлиги ижтимоий тармоқдаги саҳифасида маълум қилди.
Ҳалим ҳукумат аскарлари жангарилардан қайтариб олган Хирот вилоятининг Карух туманида ўлдирилган.
Ҳукумат армияси уюштирган жанговар амалиёт натижасида “Толибон”ларнинг йигирмага яқин жангчиси йўқ қилинган.
Улар орасида икки нафар гуруҳ раҳбари ҳам бўлган.
Яна 50 киши жароҳат олган.
Афғонистонда вазият шу йил ёзида анчайин кескинлашиб кетди.
“Толибон” ҳаракати жангарилари мамлакатнинг кўплаб қишлоқ ҳудудларини эгаллаб олди ва йирик шаҳарларга ҳужум қила бошлади.
Айни пайтда ҳукумат армияси бир қанча туманларни толиблар назоратидан қайтариб олишга муваффақ бўлган.