Пойтахтимиздаги “Ўзэкспомарказ“ марказий кўргазмалар мажмуида “Озиқ-овқат маҳсулотлари, ингредиентлар ва ишлаб чиқариш технологиялари – “UzFood – 2021” халқаро кўргазмаси ўз ишини бошлади.

Шу муносабат билан ташкил этилган тадбирда Ўзбекистон Республикаси Қишлоқ хўжалиги вазири ўринбосари Алишер Тўраев, Беларусь Республикасининг мамлакатимиздаги Фавқулодда ва мухтор элчиси Леонид Маринич, Туркиянинг мамлакатимиздаги Фавқулодда ва мухтор элчиси Олган Бекар ва бошқалар “UzFood – 2021” халқаро кўргазмаси мамлакатлар ўртасида катта мулоқот ва музокаралар майдонига айланишини қайд этди.

“Iteca Exhibitions” халқаро кўргазмалар компанияси томонидан Ўзбекистон Республикаси Қишлоқ хўжалиги, Инвестициялар ва ташқи савдо вазирликлари ҳамда “Ўзбекозиқовқатзахира” уюшмаси билан ҳамкорликда ташкил этилган ушбу кўргазмада 21 мамлакатдан 122 компания ва корхона ўз маҳсулотларини намойиш этмоқда.

[gallery-2216]

Тошкент шаҳрида фаолият кўрсатаётган “Эрмак” бренди остида ишлаб чиқарилаётган “Зафархон” компанияси ҳам улардан бири. Импорт-экспорт бўйича менежер Санжар Сагатов мазкур компания фаолияти, ишлаб чиқариш жараёни, ютуқлар ва режалар хусусида сўзлаб берди.

– Компаниямиз ташкил этилганига 30 йил бўлди, – деди у. – Етти нафар ишчи билан иш бошлаган компанияда бугунги кунда 400 нафардан зиёд ишчи-ходим меҳнат қилади. Кунгабоқар пистасини қайта ишлаб, 10 дан ортиқ турдаги писта ва 12 турдаги қурт маҳсулотларини ишлаб чиқарамиз. Йигирманчи бор ўтказилаётган ушбу “UzFood – 2021” халқаро кўргазмасида иштирок этаётганимиздан мақсад янги бозорлар, янги шартномалар ва харидорлар топишдир. 2019 йил Қирғизистоннинг Бишкек шаҳрида ўтказилган кўргазмада шартномалар тузишга эришдик. Ҳозирги пайтда Қирғизистонга бир йилда 50-60 минг долларлик маҳсулот экспортини бошлаганмиз. Орада пандемия туфайли бу ишлар бироз тўхтаб қолган эди, лекин ҳозир бу жараён давом эттирилмоқда. 2019 йил Россиянинг Санкт-Петербург шаҳрида ҳам кўргазмада қатнашиб, яхши натижаларга эришдик. Бу йил Россияга 15 минг долларлик маҳсулот экспорт қилинмоқда. Улар билан 50-60 минг долларлик шартнома тузганмиз. Шартномалар асосида Қозоғистон давлатига ўтган йил юз минг доллардан ортиқ маҳсулотларни экспорт қилган эдик. Бу йил ушбу кўрсаткични 300-350 минг долларга чиқармоқчимиз.

<iframe width="650" height="420" src="https://www.youtube.com/embed/Y_yut-Xq32c" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>

Таъкидлаш керакки, ушбу халқаро кўргазма “Iteca Exhibitions” халқаро кўргазмалар компаниясининг 2021 йилдаги пандемиядан кейинги биринчи тадбиридир. Уч кун давом этадиган кўргазма карантин қоидаларига мувофиқ ўтказилаётир.

Кўргазмада Ўзбекистон, Aвстрия, Россия, AҚШ, Беларусь Республикаси, Франция, Германия, Греция каби мамлакатлардан юздан зиёд компания ва корхоналар иштирок этмоқда. Aфғонистон, Озарбайжон ва Саудия Aрабистони корхоналари кўргазмада илк бор қатнашмоқда.

– Корхонамиз – “Кобринский маслодельно-сыродельный завод» МЧЖ Беларусь Республикасининг Брест вилоятида жойлашган, – деди ушбу корхонанинг маркетинг бўйича мутахассиси Наталья Козинская. – Корхонамиз ўзининг табиий, фойдали ва хавфсиз маҳсулотлари билан танилган. Маҳсулотларимиз сифатли ва мазали эканидан фахрланамиз. Уларни илк бор харид қилган харидор яна қайта пишлоқ, творог, музқаймоқ каби маҳсулотларимизни сотиб олади. Биз яқинда юмшоқ музқаймоқ учун қуруқ аралашмани ишлаб чиқара бошладик. Биламизки, Ўзбекистонда музқаймоқ, хусусан, юмшоқ музқаймоқ севиб истеъмол қилинади. Бу маҳсулотларни биз юртингизга етказиб бериш ниятидамиз. Икки йил олдин мазкур кўргазмада қатнашиб, яхши натижаларга эришгандик. Мамлакатингизнинг ўзига хослиги, самимий одамлари, мазали таомлари, анъаналар ва табиати бизга жуда ёқади.

“UzFood– 2021” халқаро кўргазмаси 30 апрелга қадар давом этади.

Насиба ЗИЁДУЛЛАЕВА, Ёқуб МЕЛИБОЕВ (видео), ЎзА