ЎзА Ўзбек

31.10.2017 14:34 Чоп этиш версияси

Сайёҳлик хизматини ривожлантириш бўйича 72 лойиҳани амалга ошириш кўзда тутилган

Қорақалпоғистон Республикаси Мўйноқ туманида кичик бизнес ва хусусий тадбиркорликни ривожлантириш орқали аҳоли турмуш фаровонлигини юксалтириш, инвестицияларни жалб этиш ва ишлаб чиқариш самарадорлигини янада оширишга алоҳида эътибор қаратилмоқда.

Президентимизнинг 2017 йил 28 февралда қабул қилинган "2017-2018 йиллар даврида Қорақалпоғистон Республикасининг Мўйноқ туманини иқтисодий ривожлантириш ва аҳоли бандлигини таъминлаш бўйича қўшимча чора-тадбирлар тўғрисида"ги қарори бу борада муҳим дастуриламал бўлиб хизмат қилмоқда.

Мазкур ҳужжатга асосан туманда тўқимачилик, тайёр трикотаж маҳсулотлари, томчилаб суғориш ускуналари, сув насослари, пластмасса қувурлар, электротехника ва фармацевтика маҳсулотлари ишлаб чиқаришни ташкил этиш, балиқчиликни ривожлантириш ва балиқ маҳсулотлари тайёрлаш, фармацевтика учун ярим тайёр маҳсулотлар ишлаб чиқаришни кенгайтириш, сайёҳлик хизматини ривожлантириш бўйича 72 лойиҳани амалга ошириш кўзда тутилган.

Мўйноқ туманини ижтимоий-иқтисодий ривожлантириш дастурига мувофиқ, кейинги икки йилда 52,3 миллиард сўм ва 990 минг долларга тенг бўлган лойиҳалар амалга оширилиши натижасида қарийб 1 минг 350 иш ўрни яратилади. Бугунги кунгача бу борада 40 га яқин лойиҳа ҳаётга татбиқ этилиб, 300 дан зиёд янги иш ўрни яратилди.

“Ўзпахтасаноат” акциядорлик жамияти ва “Ўздонмаҳсулот” акциядорлик компанияси томонидан амалга оширилган лойиҳаларга кўра, туман марказида “Gold Muynak masters” масъулияти чекланган жамияти ишга туширилди. Бу ерда 99 замонавий тикув машинаси ўрнатилиб, кенг турдаги халқ истеъмол моллари, иш кийимлари ва бошқа маҳсулотлар ишлаб чиқарилмоқда. 158 аёлнинг иш билан бандлиги таъминланди. Уларнинг тенг ярмини касб-ҳунар коллежларини битирган қизлар ташкил этади.

– Марказдан 18 километр олисда жойлашган “Учсой” овули фуқаролар йиғини ҳудудида яшовчи 100 аёлнинг бандлигини таъминлаш мақсадида уларнинг ҳар бирига “Ўздонмаҳсулот” акциядорлик компанияси томонидан Японияда ишлаб чиқарилган, 12 жараённи бажарадиган “Janome” русумли замонавий тикув машиналари берилди, – дейди Мўйноқ тумани ҳокими ўринбосари, туман хотин-қизлар қўмитаси раиси Зиёда Ўтегенова. – Уйда ишсиз ўтирган бу аёллар ҳам туманимизнинг иқтисодий ривожланишига ўз ҳиссаларини қўшмоқда.

“Устюртгаз” масъулияти чекланган жамиятининг “Мўйноқ оргтехника ремонт сервис” корхонаси томонидан 150 миллион сўм имтиёзли кредит маблағи эвазига “Оргтехника хизматини ташкил этиш” лойиҳаси амалга оширилиб, 10 иш ўрни яратилди. Туман марказида “АХЗ Байрон” корхонаси ўз маблағи ҳисобидан 1 миллиард 200 миллион сўмга “Суюлтирилган газ қуйиш шохобчасини қуриш” лойиҳасини рўёбга чиқариб, 7 кишининг бандлигини таъминлаган бўлса, тадбиркор Озод Қалилаев банкдан олган 70 миллион сўм кредит ва 10 миллион ўз маблағи ҳисобидан музқаймоқ ишлаб чиқариш лойиҳасини амалга оширди.

Туман марказидаги эски кинотеатр иморати таъмирланиб, “3D синема маркази” ташкил этилишида “Мўйноқ сервис” масъулияти чекланган жамияти томонидан 150 миллион сўмлик лойиҳа бажарилди. Натижада 10 киши иш билан банд бўлди.

“Ҳаким ота” овул фуқаролар йиғинидаги почта иморати таъмирланиб, дорихона, озиқ-овқат дўкони ва "Гўзаллик салони" ишга туширилди. “Султонбек бизнес Қўнғирот” масъулияти чекланган жамияти томонидан амалга оширилган 40 миллион сўмлик мазкур лойиҳа туфайли аҳолига қулайликлар яратилди. Тадбиркор Бердибек Сағиндиқов саъй-ҳаракати билан шу овулда 50 миллион сўмлик лойиҳага кўра дўкон ва маиший хизмат кўрсатиш шохобчаси бунёд этилди. Туман марказида “Деҳқон бозори”, автошоҳбекат иморатлари капитал таъмирланиб, бутунлай янгича қиёфа касб этди.

Тумандаги эски Мўйноқ консерва заводи ҳудудидан 16 гектар, 5-қурилиш бошқармаси ҳудудидан 4,5 гектар майдонда ташкил этилган кичик саноат зонасида электротехника, қурилиш материаллари, суғориш ускуналари, тайёр трикотаж маҳсулотлари ишлаб чиқаришни йўлга қўйиш мақсадида кенг кўламдаги бунёдкорлик ишлари олиб борилмоқда.

Мазкур лойиҳаларнинг амалга оширилиши натижасида 2019 йилга бориб, туманда саноат маҳсулотлари ишлаб чиқариш ҳажми 1,6 марта, халқ истеъмол моллари ишлаб чиқариш кўлами 1,5, қишлоқ хўжалик маҳсулотлари етиштириш 1,3, хизмат кўрсатиш 1,7 мартага ўсиши кутилмоқда.

Аминбой Ортиқбоев, ЎзА
9 229