Размер шрифта: A A A
Цвет сайта: A A A A

16.02.2018 15:20 Чоп этиш версияси

Жисмоний тарбия ва спорт вазирлиги ташкил этилишига бағишланган анжуман бўлиб ўтди

Жисмоний тарбия ва спорт вазирлиги ташкил этилишига бағишланган анжуман бўлиб ўтди Пойтахтимиздаги Ўзбекистон миллий академик драма театрида Ўзбекистон Миллий олимпия қўмитаси, Жисмоний тарбия ва спорт вазирлиги томонидан спорт федерация ва ассоциациялар, Олимпия захиралари спорт коллежлари, Иқтисослаштирилган болалар-ўсмирлар спорт мактаблари тизимларида фаолият олиб бораётган мутахассислар ўртасида учрашув ўтказилди.

Ўзбекистон Миллий олимпия қўмитасидан хабар қилишларича, тадбирда Ўзбекистон Республикаси Бош прокурори О.Муродов, Давлат маслаҳатчисининг ўринбосари Б.Мавлянов, Миллий олимпия қўмитаси раиси ва мамлакат футбол ассоциацияси раисининг биринчи ўринбосари У.Аҳмаджонов, Ўзбекистон Республикаси Жисмоний тарбия ва спорт вазири Ш.Исроилов иштирок этди.

Йиғилишда Ш.Исроилов дастлаб сўзга чиқиб,  мазкур учрашувдан кўзланган асосий мақсад мамлакатимизда спорт соҳасининг энг қуйи бўғинларида юзага келган муаммолар ва уларнинг ечимини аниқлаш орқали яқин кунларда Ўзбекистон Республикаси Президенти Шавкат Мирзиёев томонидан имзоланиши кутилаётган спорт соҳасини ривожлантиришга доир янги қарорнинг мукаммал кўриниш ҳосил қилишига замин яратишдан иборат эканлигини таъкидлади.

Шаҳсан Президентимиз топшириғига биноан ташкил этилган учрашувда соҳа мутахассислари ўз таклифлари билан чиқиш қилди. Мавжуд муаммолар ва уларнинг ечими хақида сўз борди. Шунингдек, айни пайтда яратилган шароитлардан самарали фойдаланмаслик, бунинг оқибатида натижаларнинг пасайиб кетиши, селекция ишларининг тўғри йўналишда олиб борилмаслиги, ёш ва иқтидорли спортчиларнинг четда қолиб кетаётганлиги энг катта камчилик эканлиги таъкидланди.

Олимпия захиралари коллежлари ва ихтисослаштирилган болалар-ўсмирлар спорт мактаблари фаолияти ислоҳотларга мухтож эканлиги, малакали кадрлар етишмаслиги, мактабгача таълим муассасалари ҳамда ўрта мактабларда жисмоний тарбия фани ва спорт тўгараклари талаб даражасида ўтилмаслиги каби муаммолар кўтарилди.

Ш.Исроилов томонидан мамлакатимизда спортни аҳоли ўртасида янада оммалаштириш ва бунинг самарасида ўзбек спортини довруғини юксалтириш,  чет эл тажрибасини ўрганиш учун халқаро алоқаларни ривожлантириш лозимлиги алоҳида қайд этилди. "Сир эмаски, спорт бугунги кунда катта сиёсат даражасига чиқиб бўлган. Агар янгиликларни, тажрибаларни ўзимиз ўрганмасак, биров бизга келиб ўргатиб бермайди. Бунинг учун қўлга китоб олиш, изланиш керак", - дедиЖисмоний тарбия ва спорт вазири.

Йиғилишда шунингдек, Ўзбекистон Республикаси Бош прокурори О.Муродов сўзга чиқиб, яқин кунлар ичида Президентимиз Шавкат Мирзиёев томонидан имзоланадиган қарорда сиз - соҳа мутахассисларининг фикри ҳам инобатга олиниши керак. Албатта, ҳақли савол туғилиши табиий. Нима учун Бош прокурор спорт масаласидаги йиғилишга келди? Чунки, янги қарор ижроси айнан Бош прокуратура томонидан назорат қилинади. Бунинг учун катта ишчи гуруҳи тузилган. Шу сабабли ҳам, мамлакатимиз раҳбарининг топшириғи билан бу ерга келдим. Спорт тизимини тубдан ислоҳ қилиш, қайта кўриб чиқиш учун нималар қилишимиз лозим? Янги қарор учун қандай қўшимчалар киритсак самарадорликка эришишимиз мумкин бўлади? Марҳамат, ўз фикрингиз билан ўртоқлашинг деди.

Ўз навбатида  У.Аҳмаджонов ҳам йиғилганлардан тортинмай ўз таклифини беришларини, мазкур тарихий қарорда яна нималарга аҳамият берилиши лозимлигини сўради:
 
"Бугунги мулоқот орқали муаммоларни ҳал қилиб, камчиликларни бартараф этишимиз керак. Айнан Сиз ва бизнинг фикримиз кутилаётган қарорда ўз аксини топади. Соҳада муаммолар етарли, бугун биз уларни аниқлашимиз, уларни бартараф этиш чораларини кўришимиз ва янги қарор самарали ишлаши учун тегишли бандларни киритишимиз зарур. Шунингдек, давлат бюджетидан ажратилаётган маблағларни мақсадли сарфланишини назорат қилишимиз, бу борада тизимни қайтадан кўриб чиқишимиз зарур” – деди МОҚ Президенти.

Шундан сўнг, Қорақалпоғистон Республикаси, вилоятлар ва Тошкент шаҳар Жисмоний тарбия ва спорт бошқармалари вакиллари, Ўзбекистон спорт фахрийлари кенгаши мутасаддилари, Олимпия захиралари коллежлари, иқтисослаштирилган болалар ва ўсмирлар спорт мактаблари раҳбарлари сўзга чиқиб, ўз таклифларини билдиришди. Спорт соҳасида тўпланиб қолган муаммолар, уларни бартараф этиш учун нималар қилиш лозимлиги ҳақида гапирдилар.

Йиғилиш иштирокчилари таълим тизимидаги жисмоний тарбия ўқитувчилари билан узвий боғлиқликни йўлга қўйиш, селекционер мураббийлар ролини кучайтириш, спорт мажмуаларини сифатли жиҳозлар билан таъминлаш, улардан фойдаланиш самарадорлигини ошириш борасида янги қарор учун лозим бўлган ўз фикр ва мулоҳазаларини маълум қилишди. Яқин кунларда эълон қилиниши кутилаётган қарорда ушбу таклифлар албатта эътиборга олиниши қайд этиб ўтилди.

Жавоҳир Тошхўжаев, ЎзА
15 081