Размер шрифта: A A A
Цвет сайта: A A A A

01.11.2017 16:22 Чоп этиш версияси

Халқаро гроссмейстер Нодирбек Абдусатторовга Президентимиз совғаси топширилди

Халқаро гроссмейстер Нодирбек Абдусатторовга Президентимиз совғаси топширилди Шахмат бўйича жаҳон чемпиони, ёш халқаро гроссмейстер Нодирбек Абдусатторовга Президентимиз совғаси топширилди.

Шу муносабат билан Шахмат бўйича республика ихтисослаштирилган болалар-ўсмирлар спорт мактабида тадбир бўлиб ўтди.

Ўзбекистон Республикаси Жисмоний тарбия ва спорт давлат қўмитаси раиси Р.Қурбонов ва бошқалар болалар спортини ривожлантириш, ўсиб келаётган ёш авлоднинг жисмоний тарбия ва спорт билан шуғулланишига кенг имконият яратиш, уларнинг иқтидор ва салоҳиятини юзага чиқаришга қаратилаётган доимий эътибор ва ғамхўрлик самарасида юртимиз ёшлари жаҳон спорт ареналарида юксак натижаларга эришаётганини алоҳида таъкидлади.

3.jpg

Ёш шахматчимиз Нодирбек Абдусатторов эришаётган натижалар бунинг яққол тасдиғидир. Нодирбек 2011 йили икки йирик мусобақа – Ҳиндистонда мактаб ўқувчиларининг Осиё чемпионатида олтин ва Филиппинда ўсмирлар ўртасидаги қитъа биринчилигида бронза медални қўлга киритган. 2012 йил Словениянинг Марибор шаҳрида ўтказилган жаҳон чемпионатида олтин медалга сазовор бўлган, Ҳиндистоннинг Деҳли шаҳрида мактаб ўқувчилари ўртасидаги VIII Осиё чемпионатининг рапид – тезкор шахмат баҳсларида кумуш медаль билан тақдирланган.

2014 йили пойтахтимизда ўтказилган шахмат бўйича Осиё чемпионатида Нодирбек Абдусатторов ўн ёшгача бўлган шахматчилар баҳсида шоҳсупанинг энг юқори поғонасига кўтарилган, блиц турнирда эса кумуш медални қўлга киритган. Жанубий Африка Республикасининг Дурбан шаҳрида бўлиб ўтган шахмат бўйича 8-18 ёшли ўғил-қизлар ўртасидаги жаҳон чемпионатида иккинчи ўринни эгаллаган.

2016 йили Россиянинг Сочи шаҳри мезбонлик қилган мактаб ўқувчилари ўртасидаги жаҳон чемпионатида иккита олтин медалга сазовор бўлган. 2016-2017 йилларда Россия ва Бирлашган Араб Амирликларида ўтказилган нуфузли мусобақаларда муносиб иштирок этиб, халқаро гроссмейстер талабини бажарган.

14.jpg

– Фарзандимнинг бундай улкан ютуқларга эришаётгани мамлакатимизда ёшларга қаратилаётган улкан эътибор туфайлидир, – дейди Нодирбекнинг отаси Фазлиддин Очилов. – Унинг халқаро майдондаги нуфузли мусобақаларда Ватанимиз шарафини муносиб ҳимоя қилиб, юртимиз ёшлари истеъдод ва салоҳият бобида ҳеч кимдан кам эмаслигини ва ҳеч қачон кам бўлмаслигини исботлаётганидан фахрланаман.

Жаҳон чемпиони, халқаро гроссмейстер Нодирбек Абдусатторов Президентимиз Шавкат Мирзиёев томонидан энг сўнгги русумдаги замонавий ноутбук билан тақдирланди.

– Президентимизнинг биз, ёшларга билдираётган юксак ишончини оқлашга ҳаракат қиламиз, – дейди Нодирбек Абдусатторов. – Бу ишонч бизга келажакда янада юксак марраларни эгаллашга куч-ғайрат бағишлайди.

Байрам Айтмуродов, Муҳаммад Амин (сурат), ЎзА
3 802






Все о погоде - Pogoda.uz